Senat Tóraǵasynyń orynbasary Sergeı Gromov, turmystyq qaldyqtardy tıimdi óńdeý - Qazaqstannyń «jasyl» ekonomıkaǵa kóshý jónindegi tujyrymdamasynyń negizgi baǵyttardyń biri ekenin atap ótti. Tujyrymdamaǵa sáıkes, qaldyqtardy óńdeý 2030 jyly 40 paıyzǵa, 2050 jylǵa qaraı 50 paıyzǵa jetkizý kózdelip otyrǵanyn aıtty. Bul rette 2016 jyly elimizdegi turmystyq qaldyqtardy óńdeý úlesi bar-joǵy 2,6 paıyzdy quraǵan.
Aımaqtarda qaldyqtardy suryptaý jáne óńdeýmen aınalysatyn 100-den astam kásiporyn jumys isteıtini aıtyldy. «Degenmen, qaldyqtardyń jekelegen túrleri ár aımaqta óńdele bermeıdi, - dedi S.Gromov. – О́zekti máselelerdi sheshýde keshendi sharalar bolmaı otyr. Bul mindetterdi sheshý úshin turmystyq qatty qaldyqtardy jınaý, tasymaldaý, óńdeý, joıý jáne saqtaý jónindegi qajetti normatıvtik quqyqtyq qujattar jasaldy».
Senat Tóraǵasynyń orynbasary qorshaǵan ortany qorǵaý isinde ekologııalyq bilimniń róline egjeı-tegjeıli toqtaldy. «Turǵyndardy oqytý jáne habardar bolýyn arttyrý úshin qaldyqtardy óńdeý men joıý, ekologııalyq mádenıetti qalyptastyrý jónindegi máselelerdi oqý baǵdarlamasyna qosý jónindegi jumystardy jalǵastyra berý kerek», dedi ol.
«KazWaste» qaldyqtardy basqarý jónindegi qaýymdastyǵy» basqarmasynyń tóraǵasy Shynbolat Baıkulov bizdiń elimizde qaldyqtardy basqarýdyń birlesken júıesi joqtyǵy týraly pikir bildirdi. Onyń málimetterinshe, turmystyq qaldyqtardyń 97 paıyzy baqylaýdan tys kúresinder men sanıtarlyq standarttar talaptaryna jaýap bermeıtin jerlerge tasylady.
Otyrysta ınvestısııalar jáne damý mınıstriniń orynbasary Ǵanı Sádibekov, Astana ákiminiń orynbasary Qosman Aıtmýhametov, Almaty oblysyn damytý jónindegi «Alataý» AQ tóraǵasynyń keńesshisi Nıkolaı Logýtov, «Operator ROP» JShS atqarýshy dırektory Sergeı Iýrcha sóz sóıledi. Pikirsaıysqa senatorlar Jeńis Nurǵalıev pen Serik Jaqsybekov te qatysty.
«О́ńir» depýtattyq tobynyń jetekshisi Mıhaıl Bortnık sharany qorytyndylaı kelip, «Jasyl» ekonomıkaǵa kóshý jónindegi tujyrymdamany iske asyrý, onyń ishinde turmystyq qatty qaldyqtardy joıý jáne óńdeý salasyndaǵy máseleler qyzý pikirtalas týdyrǵanyn atap ótti. Parlamentshiler aıtylǵan usynystardy úkimet pen jergilikti atqarý organdaryna jiberetin bolady.
