Alǵashqy jeńis

Keshe keshkisin Baký tórin­de bokstan eresekter arasyn­da ótip jatqan álem chem­pıonatynda sharshy alań­ǵa 52 kılo salmaqtaǵy bylǵary qolǵap sheberleri shyqty. Qazir bizdiń boksshylar osy­laı kún saıyn bir-birden rıngke shyǵyp,  aıqasyp ja­tyr. Tek álem chempıonatynyń ekinshi aptasynda ǵana boks­shylar eki kezdesýden ótkizetin bolady. Al ázirshe, bizge keshke deıin ulttyq quramanyń bir ǵana ókiliniń jekpe-jegin kú­tý­ge týra kelip otyr. Keshegi salmaqtaǵy aıqas­tar­da bizdiń elden Oljas Sát­ti­baı marokkolyq Abdelfattah Nadılmen alǵashqy kezdesýin ótkizdi. Jekpe-jekte biz­diń boksshy basymdyq tanyt­ty. Birinshi raýndta qarsy­la­syn ańdyp, soqqylar darytyp otyrdy. Biraq qanshama ret soqqylar jasasa da birinshi raýndty 1:0, ekinshi raýndty 6:4 esebimen aıaqtady. Al sońǵy raýndta marokkolyq eseni qaı­tarýǵa tyrysqanymen odan esh­teńe shyqpady. Bizdiń boksshy bolsa, ári qaraı saýatty qor­ǵanyp, aılasyn asyra bildi. Qorytyndy esep – 14:7. Sóı­tip, bizge álem chempıonatyn­daǵy alǵashqy jeńisti Oljas Sáttibaı ákeldi. Endi 2 qazan kúni Oljas Sáttibaı ırlandııalyq Maıkl Konlandy jeńgen moldovalyq Aleksandr Ryshkanpen kezdesedi. Eger osy synda Oljastyń joly bolyp jatsa, onda onyń joly olımpııalyq júıe bo­ıyn­sha fransýz Nordın Kýbıalılımen túıisedi. Mine, osy kezde qazaq boksshysyna ońaı bolmaıtyny belgili. Onyń qar­sylasy tájirıbeli boksshy. Kýbıalılı jerebe tartylǵan kúni alǵashqy aınalymda qarsylasy bolmaǵan soń, qatyspady. Sol sebepti birden 1/16 fınalǵa joldama aldy. Osy básekede otandasymyz fransýzdy jeń­se, onda onyń ári qaraı joly ashylady deýge bolady. Álem chempıonatynyń eń qyzyqty da tartysty aıqas­tary mine, sol kezde bastalady. Qazir fınalǵa shyǵý úshin alaqandaryn ysqylap júrgen boksshylar kóp. Reseı qurama­syn­da óner kórsetetin armıan Mısha Aloıan, kýbalyq Robersı Ramıres, Erıspandı Savon jáne basqalar júldege dámeli. Keshe 52 kılo salmaqtaǵy kezdesýde Ázerbaıjan boksshysy jeńilip qaldy. Bul alań ıeleri­niń óz jerindegi alǵashqy jeńili­si. Al Reseı men Kýba, olardyń ókshelerin basyp kele jatqan Qytaı, Ýkraına, О́zbekstan sııaq­ty elderdiń ókilderi utylyp ja­tyr degen habardy estip otyrǵan joqpyz. Qaıta, osy kúni bizge álsiz sanalatyn Avstrııa, Argentına, Albanııa, Makedonııa, Egıpet, Chehııa, Danııa, Iran, Slovakııa, Venesýela men solarǵa uqsas basqa da elderdiń ókilderi bir-birlerin jeńip, bir-birleri­nen jeńilip jatyr. Olardyń báriniń atyn atap, túsin tústep jatý artyq bolar. Álem chempıo­naty bastalarda jarystyń favorıti sanalǵan Qytaı, Reseı, Kýba elderimen salystyrǵanda, olar­dyń júldege úmiti tipten joq deýge bolady. Al AQSh, Ázer­baı­jan, Armenııa, О́zbekstan, Qytaı, Ýk­raına, Úndistan sııaqty elder­diń jóni bólek, árıne. Olar kem degende bir altyn nemese kúmis júl­deni alýǵa úmitti. Ári ketse qo­la júldeni ýystap áketýge daıyn tur. Bizdiń elimiz bolsa, ulttyq quramanyń bas bapkeri Myrzaǵalı Aıtjanov aıtqandaı, bir altyn, bir kúmis jáne bir qola medalge úmittense, London Olımpıada­sy­na bokstan bes jol­damany jeńip alýdy maqsat etýde. 28 qyrkúıek kúni 81 kıloda Ádilbek Nııazymbetov moldova­lyq Vladımır Chelespen kezdesedi. Bul aıqasta kimniń jeńetinin aıtý qıyn. Biraq Nııazym­betov­tyń jeńetinin ishimiz sezedi. Odan keıin 69 kılo sal­maq­ta eki dúrkin álem chempıony Serik Sápıev ekvadorlyq Karlos Sanchespen, 30-y kúni 64 kıloda Danııar Eleýsinov shotlandııa­lyq Djosh Teılormen, 1 qazan­da 60 kıloda Ǵanı Jaılaýov japon Shota Nakaıamamen, sol kúni 75 kg.-de Danabek Sýjanov Taıpeı ókili Iý Tın Iаnmen qolǵap túıistiredi. Sodan keıin 91 kıloda Vasılıı Levıt AQSh boksshysy Ýılıamspen kezdesse, asa aýyr salmaqtaǵy Ivan Dychko serb Mılýtın Stankovıchpen aıqasady. Serbııa ókili bizdiń elge jaqsy tanys boks­shy. Ol osy kezge deıin «Astana arlandary» kásipqoı klý­byn­da óner kórsetip keldi. Qa­zir onyń kómeginen bizdiń boks mamandary bas tartyp, ornyna basqa adamdy alamyz dep otyr. Bizdiń bapkerlerdiń bári chempıonatta Birjan Jaqyptan basqa boksshylarǵa jerebe jol­das bolǵanyn aıtýda. Degenmen, dúısenbi kúni Qytaı­dyń Olımpıada chempıony Zoý Shımınniń Domınıkan Respýb­lıkasy boksshysyn áreń degende utqanyna qarap Baký tórinde osal boksshyny tabý qıyn sııaq­ty ma deısiz. Qoryta aıt­qan­da, sharshy alańdaǵy aıqas­tar­dyń qalaı órbıtinin bir Jaratqannyń ózi ǵana biledi. Bul bizdiń ǵana emes, aýzynan Allasy túspeıtin ulttyq qura­ma músheleriniń jıi aıtatyn sózi dep bilińizder. Dastan KENJALIN, «Egemen Qazaqstan». – Bakýden (Ázerbaıjan).