Operanyń dırıjerlik tizgini maestro Alan Bóribaevtyń qolynda bolsa, qoıýshy rejısseri – belgili ıtalııalyq óner tarlany Djankarlo del Monako. Spektakldiń ssenografy – Esıo Frıdjerıo. Kostıýmer sýretshisi – «Oskar» syılyǵynyń ıegeri Franka Skýarchapıno. Qoıýshy horeograftar – Qazaqstannyń eńbek sińirgen qaıratkerleri Tursynbek Nurqalıev pen Ǵalııa Bóribaeva.
«Biz bul shyǵarmany kezdeısoq tańdaǵan joqpyz, – deıdi «Astana Opera» teatrynyń dırektory Ǵalym Ahmedıarov. – О́ıtkeni, bul bizdiń ulttyq ónerimizdiń biregeı týyndysy, sondyqtan da, spektakl kórermen kóńilinen shyǵady degen úmit zor».
Atalmysh teatrdyń bas dırıjeri Alan Bóribaevtyń pikirinshe, «Abaı» operasy ár kezeńderge laıyqtalyp jazylǵan uly mýzykalyq shyǵarmalardyń biri bolyp tabylady ári oryndaýshylardyń bıik talǵamyna tatıtyn erekshe týyndy.
Operanyń basty rólderin otandyq ártister – Qazaqstannyń eńbek sińirgen qaıratkerleri Súndet Baıǵojın men Dına Hamzına jáne Qazaqstannyń eńbek sińirgen ártisi, opera prımasy Maıra Muhamedqyzy, halyqaralyq baıqaýlardyń laýreaty Meıir Báınesh oryndasa, kelesi bir rólge armenııalyq tanymal ártis Barseg Týmanıan shaqyrylyp otyr.
Azamat Máýlenuly,
L.N.Gýmılev atyndaǵy Eýrazııa ulttyq ýnıversıtetiniń stýdenti
