Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev jetekshilik etken otyrysqa Májilis depýtattary men memlekettik organdardyń, halyqaralyq uıymdardyń jáne qoǵamdyq birlestikterdiń ókilderi qatysty.
Aqparatqa qol jetkizý, «Ashyq úkimetti» engizý jáne «Aqparatqa qol jetkizý týraly» Zańdy iske asyrý máseleleri qaralyp, talqylanǵan basqosýda Aqparat jáne kommýnıkasııalar mınıstri Dáýren Abaev atalǵan baǵytta atqarylyp jatqan jumys jaıynda baıandady. Ol óz baıandamasynda búgingi tańda mınıstrlik memlekettik organdardy jáne halyqty tehnıkalyq jáne aqparattyq qoldaý boıynsha jumys júrgizip jatqanyn atap ótti. Al Bas prokýrordyń orynbasary Andreı Kravchenko Bas prokýratýrada aqparatqa qol jetkizýdi qamtamasyz etýdiń jaı-kúıi týraly habardar etti.
Sonymen qatar, Estonııanyń Derekterdi qorǵaý jónindegi memlekettik ınspeksııasynyń bas dırektory Vılıar Peep Estonııanyń aqparatqa qol jetkizý týraly zańnamasynyń saqtalýyn táýelsiz qadaǵalaý jónindegi jumys nátıjelerin usyndy.
Oraıy kelgende sóz alǵan úkimettik emes uıymdarynyń ókilderi dóńgelek ústelge qatysýshylardyń nazaryn aqparatqa qol jetkizý boıynsha praktıkalyq eksperıment nátıjelerine aýdardy. Halyqaralyq ister, qorǵanys jáne qaýipsizdik komıtetiniń depýtattary bolsa, «Aqparatqa qol jetkizý týraly» Zań elimizdi odan ári demokratııalandyrý, azamattyq qoǵamdy qalyptastyrý men memlekettik organdar qyzmetiniń ashyqtyǵyn qamtamasyz etý úshin mańyzdy qujat bolyp tabylatyndyǵyna toqtaldy.
Jıyndy qorytyndylaǵan komıtet tóraǵasy M.Áshimbaev qaralyp otyrǵan máseleniń jan-jaqty ári naqty talqylanǵanyn atap ótip, «Aqparatqa qol jetkizý týraly» Zańdy iske asyrý boıynsha memlekettik organdardyń jumysynda birqatar kemshilikter bar ekendigin eskertti. Sondyqtan da syndarly eskertýler men usynystardy memlekettik organdardyń eskerýi qajettigi aıtyldy.
Nurlybek Dosybaı,
«Egemen Qazaqstan»
