Bul mindettiń kúrdeliligin Elbasy naqty paıymdap, «... Bul mindet bilim berýdiń, mádenıet organdarynyń, qoǵamdyq uıymdardyń, buqaralyq aqparat quraldarynyń barlyq júıesine, árbir otbasyna qatysty. Al ony eldiń týyn, eltańbasyn, ánuranyn qasterleýden, zańdy ókimetti qurmetteýge tárbıeleýden bastaý kerek. Árbir adam bala kezinen Qazaqstan – meniń Otanym, onyń men úshin jaýapty ekeni sııaqty, men de ol úshin jaýaptymyn degen qarapaıym oıdy boıyna sińirip ósetindeı etken jón», -degen bolatyn. Halyq júregin jelpigen erkindik samaly ǵajaıyp shyǵarmashylyq belsendilikke jol ashty. Elbasymyz jańa memlekettik rámizderdi qabyldaýǵa zor mán berdi.
Qazaqstan Respýblıkasynyń Táýelsizdigimen birge jasasyp kele jatqan memlekettik rámizderimiz 25 jyl ishinde óz ómirsheńdigi men eliniń aıbynyn asqaqtatty. Qoldanystaǵy zańnamalar men halyqaralyq sharttarǵa sáıkes, halyqaralyq, memlekettik nemese sporttyq is-sharalarda memlekettiń ánurany oınatylyp, týy kóteriletini belgili. Táýelsizdik alǵan ýaqyt ishinde kóptegen halyqaralyq is-sharalar men sporttyq jarystarda qazaq eliniń Gımni ózge de alpaýyt eldermen ıyq tiresip, talaı elderdiń aspanynda shalyqtap, kók týymyz talaı jelbiredi.
1992 jylǵy 4 maýsymynda Qazaqstannyń jańa memlekettik rámizderi alǵash ret bekitilgen bolatyn. Al 2007 jyly 4 maýsymda «Qazaqstan Respýblıkasynyń Memlekettik rámizderi týraly» Konstıtýsııalyq Zań qabyldandy. Osy Zańǵa sáıkes, jyl saıyn 4 maýsym - Qazaqstanda Memlekettik rámizder kúni retinde merekelenedi.
Osy merekege oraı S.Báıishev atyndaǵy Aqtóbe oblystyq ámbebap ǵylymı kitaphanasynda «Táýelsiz Qazaqstannyń qurylýyndaǵy memlekettik rámizderdiń mańyzdylyǵy» atty dóńgelek ústel uıymdastyryldy. Oǵan Aqtóbe qalasynyń ishki saıasat bóliminiń bas mamany Á.Jumamuratova, Oblystyq «Ádilet» departamentiniń bas mamany G.Raıymqulova, Tehnıkalyq retteý jáne metrologııa komıtetiniń Aqtóbe oblysy boıynsha departamentiniń bas mamany A.Týrebaev, «Baılanys jáne kommýnıkasııa» kolledjiniń stýdentteri men oqytýshylary, oblystyq kitaphanalardyń qyzmetkerleri qatysty.
Shara barysynda memlekettik rámizder týraly Qazaqstan Respýblıkasynyń zańnamalary men normatıvtik quqyqtyq aktileri túsindirile otyryp, Qazaqstan Respýblıkasynyń memlekettik rámizderin, sondaı-aq olardyń beınesi bar materıaldyq obektilerdi qoldaný jáne daıyndaý satysy, qandaı jaǵdaılarda memlekettik rámizderdi ornalastyrý mindetti bolatyny jáne Táýelsiz Qazaqstannyń qurylýyndaǵy memlekettik rámizderdiń mańyzdylyǵy, mereke kúnine arnalǵan qandaı qalalyq is – sharalar ótkiziletini týraly aıtylyp, ózekti máseleler talqylandy, qoıylǵan suraqtarǵa naqty jaýaptar berildi.
Sharany kitaphana dırektory N.Jumaǵul quttyqtaý sózimen qorytyndylap, jastarǵa memlekettik rámizderin qurmetteýge jáne qasterleýge shaqyrdy.
QR memlekettik rámizderiniń tarıhy týraly slaıd pen beınerolık kórsetilip, «Elimniń rámizderi – Táýelsizdiktiń belgisi» taqyrybymen kitap kórmesi uıymdastyryldy.
S.Báıishev atyndaǵy Aqtóbe oblystyq
ámbebap ǵylymı kitaphanasynyń
bólim meńgerýshisi
Lıza QARAǴOIShINA
