4 maýsym – Qazaqstan Respýblıkasynyń Memlekettik rámizderi kúnine oraı, Taraz qalasyndaǵy «Dostyq» alańynan bastap Tóle bı dańǵyly boıyndaǵy Qazaqstan Respýblıkasy Tuńǵysh Prezıdenti saıabaǵyna deıin merekelik sherý uıymdastyryldy. Oǵan oblys ákimi Kárim Kókirekbaev bastaǵan jergilikti memlekettik qyzmetshiler, ardagerler men sportshylardan quralǵan barlyǵy jeti júzden astam adam qatysty. Sondaı-aq, el rámizderiniń 25 jyldyǵyna oraı uıymdastyrylǵan saltanatty shara barysynda sherý quramynda bolǵan Qazaqstanda jasalǵan 25 avtokólik pen 25 veloshabandozdar da qala turǵyndarynyń kózaıymyna aınaldy. Birneshe shaqyrymdy jaıaý júrip ótken sherý quramyndaǵylar patrıottyq rýhta áńgimeler aıtyp, jastardy el rámizderin árdaıym qurmetteýge shaqyrdy. Al áskerı qyzmetshilerdiń Memlekettik Tý, Eltańba sııaqty qundylyqtarymyzdy qasterlep, joǵary kóretip júrýleri de sherý kórkin asha tústi.
Áskerı orkestrdiń súıemeldeýimen Qazaqstan Respýblıkasy Tuńǵysh Prezıdenti saıabaǵyna jetken sherý quramyndaǵy azamattar Qazaqstan Respýblıkasynyń Memlekettik Gımnin oryndady. Sondaı-aq, sherý sońy oblys ónerpazdarynyń qatysýymen «Meniń Qazaqstanym!» atty merekelik konsertke ulasty.
Budan bólek, «Qazfosfat» jaýapkershiligi shekteýli seriktestiginiń sport kesheni, ortalyq T.Rysqulov saıabaǵy, oblystyq mamandandyrylǵan sporttaǵy daryndy balalar mektep-ınternaty, Temir jol beketi jáne avtobeket, «Aýyl-Bereke» jáne «Atakent» bazarlary, halyqaralyq «Áýlıeata» áýejaıy, sondaı-aq ózge jerlerde de Qazaqstan Respýblıkasynyń Memlekettik Gımniniń bir mezette oryndaýlary ótti.
Hamıt Esaman,
«Egemen Qazaqstan»
Jambyl oblysy
