Áýeli motosıkl mingen shabandozdar Oral-Atyraý trassasy boıyndaǵy «ORAL» jazýynyń tusynan kók týdy jelbirete júrip, estafetany Dınama» sport bazasynyń tusynda eskekshilerge tapsyrdy. Baıdarkashylar Shaǵan ózeninde aǵysqa qarsy júzip, ortalyq demalys parkine jetti. Osy jerde Qazaqstan Respýblıkasyna eńbek sińirgen sport sheberi, sambo kúresinen tórt dúrkin álem chempıony Erbolat Baıbatyrov bastaǵan sportshylar týdy kútip alyp, P.Atoıan atyndaǵy stadıon aldyndaǵy alańǵa jıylǵan veloshabandozdarǵa jaıaý júgirip alyp jetti.
Budan keıin kók baıraq velokortejdiń alqalaýymen búkil qalany kesip ótip, Oral qalasynyń jańa alańyna jetkizildi. Bul jerde «Batys qamqor», «Jasyl el», «Oral stýdentteriniń alıansy» jastar uıymdarynyń ókilderi ádemi fleshmob jasap, kútip turǵan edi.
Kók týdyń jelbiregeni – talaı janǵa qýat bergeni anyq!
Qazbek QUTTYMURATULY,
"Egemen Qazaqstan"
ORAL
Sýretterdi túsirgen Aıbatyr NURASh
