AQSh, Ońtústik Koreıa, Germanııa, Qytaı, Túrkııa, Reseı, Qazaqstan jáne taǵy basqa da taıaý shetelderdiń dáriger –hırýrgtary, travmatolog pen ortoped mamandarynyń bastary túıisken májilisti Qazaqstanda ótkizý qajettiligi qaıdan týyndady?
Sirá, bul saýaldyń jaýabyn óz qandasymyz, ulty qazaq, AQSh-tyń Mıssýrı shtatyna qarasty Sent Lýıs klınıkasynyń bas dárigeri, pofessor, medısına ǵylymynyń doktory Joldas Quljanov berdi dedi «Egemen Qazaqstan» tilshisi. Ol ortoped-hırýrg maman retinde osy saladaǵy memleketter arasyndaǵy salystyrmaly derekterge únemi nazar aýdaryp júretinin aıta kelip, Qazaqstan aýyr aralas jaraqattar alý kórsetkishteri boıynsha álemdergi memleketterdiń alǵashqy úshtigine kiretini jónindegi sumdyq derekti alǵa tartty.
Halyqaralyq ıntegrasııa sıpatyndaǵy kezdesýler kezinde álemdegi ozyq damyǵan elderdiń densaýlyq saqshylary jaraqattan saý-tamtyǵy qalmaǵan aǵzany, sonyń ishinde jambas jáne aıaq-qol súıekteriniń jáne basqa da zaqym kelgen múshelerdi qalaı qalpyna keltirýge bolatyny jónindegi tájirıbelerin ortaǵa saldy. Sondaı-aq olar osy bir kúnderde aýyr da kúrdeli otalar jasaýǵa qatysyp, sheberlik saǵattary men sabaqtaryn ótkizdi. Sonymen birge súıekterdiń zaqymdanýynan zardap shegip júrgen klıentter men óńir turǵyndaryna jáne klınıkalarda emdelip jatqan aýrýlarǵa tegin keńester berdi.
Halyqaralyq ıntegrasııa aıasynda Aqtóbe oblysynyń ákimi Berdibek Saparbaev pen AQSh-taǵy ortopedııalyq gospıtaldiń jetekshisi Joldas Quljanov jáne Qytaıdaǵy Shyńjan-Uıǵyr avtonomııalyq oblysyndaǵy halyqtyq gospıtaldyń travmatolog dárigeri Mıao Sıýagangom ózara yntymaqtastyqty damytý jónindegi memorandýmdarǵa qol qoıdy. Munda taraptar óz qarym-qatynastary keń quqyqtyq jáne ózara tıimdilik negizinde Qazaqstan Respýblıkasynyń zańnamasyna sáıkes nyǵaıtatyny jáne damytatyny kórsetilgen. Osyǵan oraı olar aýyr aralas jaraqattardy emdeý men qalpyna keltirý jónindegi birlesken is-sharalar keshenin júzege asyrmaq. Bul úshin taraptar jumysshy toptaryn quryp, yntymaqtastyq tetigin ázirleý jáne ony odan ári jetildirý men damytý jóninde úılestirýshi organdar qurý týraly uıǵarymǵa kelip otyr. Bul turǵyda aqaparat almasý máselelerine basymdyq berilgen.
Temir Qusaıyn,
«Egemen Qazaqstan»
AQTО́BE
