Desek te, tarıhı nysanǵa baratyn joldyń joqtyǵy osy ýaqytqa deıin janǵa batyp kelgen edi. Osy máselege oraı mekeme basshysy T.Moldaqynov joǵary bıik minberlerden talaı márte másele etip kóterip kelgen bolatyn. Kóterilgen másele ótken jyly oń sheshimin taýyp, Jambyl oblysynyń ákimi K.Kókirekbaevtyń tikeleı aralasýymen búginde qalashyqqa aparatyn jol qurylysy qyzý júrgizilýde. Osylaısha byltyrǵy qarasha aıynda Aqyrtasqa aparatyn joldyń qurylysy bastalyp ta ketti.
Búginde merdiger qurylysshylar 7,1 shaqyrymdy quraıtyn jol jabynyn (asfalt) tóseý jumystaryn júrgizýde.
– Sanaýly kúnderde bastalǵaly otyrǵan halyqaralyq «EKSPO-2017» kórmesine keletin týrısterdiń, tarıhy tereńde jatqan kıeli óńirimizge de atbasyn buratyny sózsiz. Osyǵan oraı, qurylys qarqynyn jedeldetip, jol jóndeý jumystaryn ústimizdegi jyldyń 5 maýsymyna deıingi aralyqta, merziminen buryn aıaqtaımyz dep josparlap otyrmyz, – deıdi jol salýshy mamandar.
Qazirgi tańda jol boıynda temir-beton qubyrlaryn ornatý jumystary aıaqtalyp, asfalt tóseý jumystary bastalýda. Jumysshy kúshi men tehnıka jetkilikti. Qarajat ta ýaqtyly aýdarylýda. Joldyń sapasyn baqylaýshy kompanııalar joldy óz nazarlarynda ustap otyr.
Eske sala keteıik, buǵan deıin qalashyqtyń negizgi bóliginde ejelgi qalashyq aýmaǵyn aralaıtyn ishki arbat jıekteri qaıta jóndelip, retke keltirilgen bolatyn. Keshende atqarylyp jatqan qaıta jańǵyrtý, abattandyrý jumystarynyń barlyǵy derlik «EKSPO-2017» halyqaralyq kórmesine ázirlik aıasynda jandana túsýde. Týrıstik baǵyt tizbesine engen tarıhı nysan osylaısha meımandardy jańa bet-beınesimen qarsy almaq.
Almas MUHTAROV
