Bóbek – balabaqsha bezbeni. Onyń kúndelikti kóńil-kúıine, júris-turysyna, ynta-yqylasyna, qabilet-qarymyna qarap-aq «Perishte patshalyǵyndaǵy» ahýaldy ańǵarasyń. Árıne, bir balamen búkil ujymnyń tynys-tirshiligin bezbendeýge bolmaıtyny belgili. Biraq, boljamnyń bodaýyna jarap jatyr. О́zim kúni keshe zeınetkerlikke shyqqan «Ertegi» balabaqshasynyń burynǵy basshysy Rysqal Iаryshevany bilikti bala baǵbany dep baǵalaımyn. Mektep jasyna deıingi balalar mekemesin atyna saı ustady. Quldyrańdaǵan kenje qyzym Aıaýlymnyń arqasynda úsh jyl ózim de sol «ertegi áleminiń» ádemi áserin bólistim.
Burnaǵy jyly balabaqshaǵa kúrdeli jóndeý júrgizetin bolyp, búldirshinderdi bólip-bólip jiberdi. Bizge úıdiń aldyndaǵy balabaqsha buıyrdy. Keshke barǵanymda mekeme basshysy qolyma keńse zatynyń tizimin ustatty. «Mynaýyń dúnıeniń zaty ǵoı?!» dedi zaıybym, onsha unatpaı. Saýdalasyp jatý – uıat! Aıtqanyn alyp berdim.
Ony qoıshy, qıǵylyqtyń kókesin qyzymnyń «qıqarlyǵynan» kórdim. Barǵanyna bir apta ótti me, ótpedi me: «О́zimniń «sadıgime» apar!» degendi shyǵardy. Aıtqanǵa túsinbeıdi. Tańerteń úıden shyqqan bette týralap «Ertegige» tartady. Aldap-sýlap úsh aıdy áreń ótkizdik.
Moıyndaý kerek, bardyń baǵasyn bilmeımiz. Keıde aıyna tólegen 8 000 teńgeni buldaımyz. Bala tárbıesi tek soǵan tirelip turǵandaı tepsinemiz. Eger sol aqshany berip «Balańdy baq!» dese, «Mynaý aýyz shaıýǵa kelmeıdi ǵoı!» dep betten alar edik. Al, esi aýyp qalmaı, otyz úıdiń erkesiniń tilin tapqan tárbıeshige eskertkish qoısa, artyq emes. Biz jaıshylyqta bir aýyz jyly sóz aıtýǵa jaramaımyz.
Qyzym keıingi tárbıeshisi Qarlyǵa Naýryzbaevany «menshiktep» alǵany óz aldyna, onyń aldyndaǵy Qarlyǵash Sarınova men Gúlmıra Áshirbekovaǵa, basqa balabaqshaǵa basshy bolyp ketken Alma Orazalınaǵa kezdeısoq kezdesip qalǵanda «Meniń tátem!» degende, eriksiz oılanyp qalasyń. Bala baǵbanyna degen qurmetiń arta túsedi.
Úsh jyl óte shyqty. Biraq, bosqa ketken joq. Onyń jemisin 1-synypta oqıtyn balamnyń boıynan kóremin. Balabaqsha ujymyna rızashylyǵymdy bildiremin. «Eshten – kesh jaqsy!».
Álibek ÁBDIRASh,
jýrnalıst
Qaraǵandy oblysy,
Sátbaev qalasy
Sýretti túsirgen avtor
