Alǵashqyda 70 shaqty shákirt tárbıelegen mektep-medrese búginde 2 myńǵa jýyq oqýshyǵa bilim beretin mektep-gımnazııaǵa aınalyp otyr. Bir ǵasyrdan astam ýaqyt jas urpaqty bilim nárimen sýsyndatqan qarashańyraq sońǵy qońyraý merekesinde týǵan balalaryndaı túlekterin baýyryna jınady. Olardyń arasynda pedagogıka salasynyń belgili ardagerleri Dámesh О́mirbekqyzy osy mektepti 55 jyl buryn bitirse, Aıash Jumaǵulov, Ospan Súleımenov esimdi ardagerler oqý ordasyn jarty ǵasyr buryn aıaqtaǵan eken. Eń ǵajaby, sońǵy qońyraý syńǵyryn estýge mekteptiń 80 jyl burynǵy túlegi Úkijan Sádýaqasqyzynyń qatysýy boldy. 1937-1941 jyldary atalǵan mektepte bilim alǵan 95 jastaǵy qarııa – asyldyń synyǵy, Sádýaqas qajy Ǵylmanıdiń qyzy.
Jaz jaınatyp, kún kúldirip,
Biz lagerge baramyz,
Asyl jibek – gúl ústinde,
Aýnap, oınaq salamyz, dep ándetken ájeı quldyrańdaǵan oqýshy kúnindegi jattaǵan jyr joldaryn áli de jatqa aıtatyn jady sergek jan bolyp shyqty. Saryarqa tósindegi alǵashqy mektepte oqyǵan oqýshy qyzdardyń shashy tobyǵynan da asyp, shubatylyp jatatynyn, osy uzyn shashqa aq bantık taqqandaryn, sısa kóılekterin túnde jýyp, kúndiz kıip alatynyn aıtqan ájeı mektepte úzdik oqyǵanyn jetkizdi.
– Jaqsy oqıtyn balalardy muǵalimder de jaqsy kóretin, – deıdi keıýana.
HH ǵasyrdyń basynda Arqa tósindegi oqyǵan azamattardyń óz kúshterimen turǵyzǵan qyzdar medresesiniń ǵımaraty Astanada búginge deıin saqtalǵan. Bul ǵımaratty salýǵa sol zamannyń degdar azamattarynyń biri, ákesi Sádýaqas qajy Ǵylmanı da úles qosqanyn áńgimelegen ájeı óziniń Naǵıma Látıpova esimdi qyzben bir partada otyrǵanyn, ol ýaqytta qara partanyń oqýlyq qoıatyn, ashylyp, jabylatyn qaqpaǵy bolǵanyn, sondaı-aq, sııa toly dáýittiń bala bitkenniń ústi-basyna tógilip, barshasynyń sııa-sııa bolyp júretinin jetkizdi. Seksen jyldan keıin ózi oqyǵan bilim ordasyndaǵy sońǵy qońyraý syńǵyryn esitken qarııa óskeleń urpaqqa batasyn berip, jańa ómirge qadam basqan túlekterge aqjol tiledi.
Dýman ANASh,
«Egemen Qazaqstan»
