Fılmniń ózegi – jetimder úıiniń tárbıelenýshisi jetkinshek Bıbol men jarynan aıyrylyp, jalǵyzdyqqa dýshar bolǵan qamkóńil qarııa Qasymhan Ahatulynyń arasyndaǵy qyzyqty hám taǵdyrly oqıǵalar negizinde órbıdi.
Jetim bala Bıbol men Qasymhannyń kezdeısoq jolyǵýynan bastalǵan kórinis ári qaraı tez shıryǵady. Qarııanyń kosmopolıt ári tasbaýyr qyzy ákesiniń úıin satqyzyp, onyń qarjysyn ózi paıdalanbaq. Baspanasyz ákesin qarttar úıine ótkizbek. Al Bıbol aqsaqalǵa jan jylýyn syılaǵysy keledi. Biraq ázirge dármensiz...
Ásirese, shermende shaldyń bir epızodta panasyz jetimekti qushaǵyna qysyp otyryp: «Ýa, dúnıe-aı! Qara shashym aǵaryp qartaıǵanǵa deıin men nemere súıe almaı shermende júrsem, sen besikten beliń shyqpaı jatyp atasyz qalyp qańǵyryp júrsiń! Bul ne taǵdyr sonda?!» dep kúńirenýi – bul kınonyń kúrmeýi. Taǵdyry qıyn kúrmeýdi rejısser sátti sheshipti: fılm sońynda qarııa men bala – ata men nemerege aınalady.
Týyndynyń tusaýkeser rásimine qatysqan Mádenıet jáne sport mınıstri Arystanbek Muhamedıuly rólderdi somdaýǵa tájirıbeli, talantty óner ıeleri qatysqandyqtan shyǵarma osal bolýy múmkin emes degenge toqtalyp, shyǵarmashylyq ujymǵa óz atynan alǵys bildirdi.
Shara sońynda rejısser Talǵat Temenovtyń de pikirine qulaq túrdik:
– Bul fılm alǵashynda «Kishkentaı hanzada» dep atalǵan. Keıin ony «Bıbol» dep ózgerttik. Qazirgi qazaq qoǵamyndaǵy tastandy bala men qarttar úıin saǵalaǵan qarııalardyń kóbeıip ketýi, ásirese, tek baıýdy maqsat tutqan, áke-sheshesinen jeringen margınaldanǵan urpaq fılmde kórinis tabady.
– Fılm túsirýge qansha ýaqyt jumsaldy?
– Ssenarıı jazýǵa bir aı ýaqyt jumsalyp, al fılmdi 19 kúnde túsirip úlgerdik. Byltyr kórermenge jol tartýy kerek edi. Qarjylyq sebepterge baılanysty keshikti.
– Týyndy úlken ekranǵa qashan shyǵady jáne onyń basty ereksheligi retinde ne aıtasyz?
– Aldaǵy qyrkúıek aıynda fılm úlken ekranǵa shyǵady. Týyndynyń basty ereksheligi – mýzykalyq árlenýi. Meniń barlyq fılmderime mýzyka jazǵan talantty kompozıtor Tólegen Muhamedjanov. Osy dosymnyń arqasynda bul fılmniń de mýzykalyq árlenýi óte tamasha shyqty. Sonymen qatar, daryndy dombyrashy Aıbek Bekbosynovtyń oryndaýynda qazaqtyń kúılerin paıdalandyq. Bir sózben aıtqanda, fılmniń ulttyq boıaýy qanyq, qazirgi qoǵamdaǵy oǵash oqıǵany sátti bere alýymen qundy.
– Basty róldi somdaǵan ártisterdi tańdaý qalaı boldy?
– Aqsaqaldyń rólin somdaǵan Tóleýbek Aralbaı aǵamyzǵa qatysty tańdaýda kóp qınalǵan joqpyz, al jetim bala Bıboldyń róline 2000-nan astam jetkinshek tartyldy. Osylardyń ishinen Esik qalasynda turatyn kishkentaı bala Ánýar Tóleýǵajy tańdalyp alyndy. Qosymsha epızodtaǵy keıipkerlerdi Astana qalasyndaǵy Q.Qýanyshbaev atyndaǵy Memlekettik akademııalyq qazaq mýzykalyq drama teatrynyń ártisteri somdady.
Beken QAIRATULY,
«Egemen Qazaqstan»
