Bıyl 8 237 gektarǵa kóktemgi egis jumystary júrgizildi. Bul ótken jylmen salystyrǵanda 633 gektarǵa artyq. Oblystyq jer qatynastary basqarmasynyń basshysy Arman Bajenovtiń aıtýynsha, paıdalanylmaǵan jer ýchaskelerin anyqtaý maqsatynda túgendeý jumystary júrgizilip otyrady. Osyndaı shara barysynda basqarma 100,5 myń ga jer ýchaskesiniń ıgerilmegenin anyqtaǵan. Jer tozýyn boldyrmaý, elimizdegi jer zańdarynyń saqtalýy da únemi nazarda.
«Jyl basynan beri basqarma tarapynan 372 tekserý júrgizilip, 339 zań buzýshylyq belgili boldy. Aýylsharýashylyǵy maqsatyndaǵy paıdalanylmaı otyrǵan jerlerge salyq mólsherin on eseden asyrmaı ulǵaıtý boıynsha tıisti sheshim qabyldandy», deıdi Arman Bajenov.
Qazir oblys boıynsha 102 915 azamat jeke turǵyn úı qurylysy úshin jer ýchaskesiniń kezeginde tur. Atyraý qalasynyń ózinde 82 myńnan astam azamat jer telimine muqtaj. Bıyl 2004 jyly kezekke turǵan azamattardyń ótinishteri qanaǵattandyryla bastady. Halyqty baspanamen qamtýda Elbasy tapsyrmasymen qolǵa alynǵan memlekettik baǵdarlamalardyń kóp kómegi bar.
Oblystyq qurylys basqarmasy basshysynyń orynbasary Mereı Jantóreev aımaqta «Nurly jer» baǵdarlamasy aıasynda 37 kóppáterli turǵyn úı qurylysy júrip jatqanyn aıtady. Bul jyl sońyna deıin 2007 atyraýlyq otbasy jańa qonysqa ıe bolady degen sóz. Páterlerdiń jalpy aýmaǵy – 135,7 myń sharshy metr.
«Keler jylǵa Atyraý qalasynyń «Bereke», «Nursaıa» yqsham aýdandarynan 4416 páterlik 44 kóppáterli turǵyn úı qurylysy men eki mektep jáne eki balabaqshanyń joba-smetalyq qujattamasy jasaqtalyp jatyr», deıdi Mereı Jantóreev.
Baqytgúl BABASh,
«Egemen Qazaqstan»
