Búgin Májiliste ótken úkimet saǵatynda ǵarysh salasynyń damý qarqyny jan-jaqty qaraldy.
«Jerdi qashyqtyqtan zondtaýdan alynǵan sýretterdi óńdeý qajet. Olardy óńdeý úshin tıisti kadrlar, materıaldyq, tehnıkalyq resýrtar joq», - deıdi QR Parlamenti Májilisiniń depýtaty Shafhat О́temisov.
Bul túıtkildiń túıinin tarqatý úshin Úkimet memlekettik organdar janynan geoportal ashýdy usynyp otyr. Sol arqyly mamandar oqytylyp, spýtnık arqyly túsirilgen sýretterdi odan ári óńdeý isi qolǵa alynbaq. Biraq bir portaldy iske qosýdyń ózine shamamen 100 mln teńge qajet.
«Ár salaǵa arnaıy geoportal salý úshin 4,8 mlrd teńge qajet. Ony durys paıdalaný úshin mamandar daıarlaý kerek», deıdi QR Qorǵanys jáne aeroǵarysh ónerkásibi mınıstri Beıbit Atamqulov.
Ǵarysh salasyn odan ári damytý úshin jumsalatyn shyǵyn munymen shektelmeıdi. Sebebi, 2023 jyly KazSat-2 jerseriginiń qoldanylý merzimi aıaqtalady. Sondyqtan jańa apparatty jobalaý jumysy bastaldy. Úkimet saǵatynda «Baıqońyr» ǵarysh aılaǵyn damytý jaıy da qozǵaldy.
«Baıqońyr» keshenin damytý jobasy aıasynda ondaǵy nysandardy kútip-ustaý men paıdalaný boıynsha jumystardy qarjylandyrý máselesin sheshý kerek. «Báıterek» jańa ǵarysh zymyran kesheninen birinshi ushyrylymdy 2025 jyly júzege asyrý josparlanyp otyr. Sol arqyly ekologııalyq problemalardy sheshýge bolady. Jańa zymyran geptıldi «Protondy» almastyrady», - deıdi Atamqulov.
Mınıstrdiń málimdetinshe, el úkimeti «Baıqońyr» keshenin damytý jobasyn jalǵastyrady. Iаǵnı 60 jylǵa jýyq ýaqyttan beri aspan men jer arasyn jalǵaǵan aılaq el múddesi úshin jumys isteı bermek.
Buǵan qosa, ǵarysh apparattaryn qurastyrý, synaq keshenderi men jerdi qashyqtyqtan zondtaý júıesine arnalǵan tyń bastamalar qolǵa alynady. Al maman tapshylyǵyn joıý úshin úkimet kúzge deıin jańa zań jobasyn ázirleýi tıis.
