Baspasóz májilisine Ulttyq ekonomıka birinshi vıse-mınıstri Rýslan Dálenov jáne Statıstıka komıtetiniń tóraǵasy Nurbolat Aıdapkelov qatysty.
«Jarııalanǵan jańǵyrtýdyń úshinshi kezeńi jańa joǵary tehnologııalyq salany, barlyq jerde ınnovasııalardy qoldanýdy bildiredi. Sıfrly ekonomıka damıdy, bul jahandyq úrdis. Jáne «jańa ekonomıka» statıstıkany aınalyp ótpeýi tıis. Sondyqtan biz ádistemeni zamanaýı halyqaralyq tájirıbe negizinde jetildirýdemiz. Sonymen qatar statıstıka saıtynda jańa «3.0 Jańǵyrtý» bólimin ashamyz. Statıstıka Qazaqstannyń úshinshi jańǵyrtylýyn esepteıtin bolady», dedi R.Dálenov.
Vıse-mınıstr statıstıkanyń aǵymdaǵy jumystary da qaıta jańartylatynyn atap ótti. Sondaı-aq, endi sıfrlardy turaqty negizde jan-jaqty túsindirip, qosymsha esep ádistemesi de aıtylmaq. Sonymen qatar, statıstıka saıtyndaǵy barlyq ádistemeler kórsetkishterdiń qalaı esepteletinin mysaldar arqyly ashyp kórsetetin bolady. Bul úshin kórnekilik tolyq eseppen arnaıy aıdar ashylmaq, bul arqyly senimdilik pen keri baılanys artady dep kózdelýde.
«Biz statıstıkanyń ádistemesin jetildirý úshin onlaın alańy arqyly jańa qarym-qatynas formatyn damytýǵa daıynbyz. Jýrnalısterdi, ekonomısterdi, qoǵamdy, azamattardy talqylaýlarǵa belsendi qatysýǵa shaqyramyz», dedi vıse-mınıstr.
Sóıtip saıt barynsha jańartylyp, onyń mobıldik qosymshasy jasalmaq. Statıstıka saıtynda sondaı-aq halyq sanyn esepteýshi, basqa da ózekti derekterdi esepteýshi, ınfografıka sııaqty qyzyqty aıdarlar paıda bolady.
Qazaqstanda sıfrly tehnologııalar men ınternetti qoldaný arqyly qurylatyn ekonomıkalyq qatynastar aýqymy ulǵaıyp keledi. Mysalǵa, qazaqstandyqtardyń arasynda uıaly baılanysty paıdalanýshylar sany − 97 paıyzǵa, ınternet paıdalanýshylar sany 77 paıyzǵa jetken.
«Internet arqyly jasalatyn satylymdar kóbeıdi, onlaın-fılmder kóretin, elektrondy kitaptar oqıtyn, smartfondaryna túrli qosymshalar júkteıtin adamdar qatary artty», dedi R.Dálenov.
Al qazirgi kúni iri halyqaralyq uıymdar qazaqstandyq statıstıkanyń deńgeıin joǵary baǵalaıdy. Bul týraly Statıstıka komıtetiniń tóraǵasy Nurbolat Aıdapkelov málimdedi.
Statıstıkalyq aqparattyń durystyǵy ózekti máselelerdiń biri bolyp sanalady. Statıstıkalyq tájirıbede «jahandyq baǵalaý» uǵymy bar. Qazaqstandyq statıstıka júrgizile bastaǵan kezeńnen beri osyndaı baǵalaý jumystary elimizde úsh ret – 2003, 2008 jáne 2016 jyldary júrgizilgen.
«2016 jyldyń sońy men 2017 jyldyń basynda bizdi úsh iri halyqaralyq uıym – BUU Eýropalyq ekonomıkalyq komıssııasy, Eýrostat jáne Erkin saýda qaýymdastyǵy baǵalady. Sonyń nátıjesinde olar qazaqstandyq statıstıkada eleýli ilgerileýdiń bar ekenin aıqyndap, bizge Ortalyq Azııa óńirindegi kóshbasshy ataýyn berip, ádisteme boıynsha tájirıbemen bólisýge shaqyrdy», dedi N.Aıdapkelov. Jalpy, komıtet tóraǵasynyń aıtýynsha, statıstıkany 5 000-ǵa jýyq kórsetkish qalyptastyrady. Elimizdiń Statıstıka komıtetine esepter onlaın rejimde jáne qaǵaz túrinde kelip túsedi, komıtet mamandary kelgen aqparattarǵa taldaý jasap, qajet bolǵan jaǵdaıda olardyń durystyǵyn qaıta tekseredi.
Dınara BITIKOVA,
«Egemen Qazaqstan»
