Maqala jaryq kórgennen beri buqaralyq aqparat quraldarynda, aımaqtarda qyzý talqylanǵan maqalany endi halyqqa tarqatyp túsindirý maqsatynda jer-jerde zııaly qaýym ókilderimen kezdesýler ótip jatyr. Almaty oblysy, Jambyl aýdanynda Qazaqstan halqy Assambleıasynyń uıytqysymen jazýshylar Nesipbek Dáýtaıuly jáne Marhabat Baıǵutpen kezdesý ótti. Kezdesýge aýdan basshylyǵy, soǵys ardagerleri, basqarma basshylary, ustazdar, oqýshylar qatysty. Qalamgerler Elbasynyń maqalasyndaǵy mańyzdy alty qadamnyń el bolashaǵyna aıqyn baǵdar beretinin taratyp aıtty. Máselen, Marhabat Baıǵut Ońtústik Qazaqstan oblysyndaǵy atqarylyp jatqan jumystardy mysal retinde keltirip, tájirbıe almasýǵa bolatynyn jetkizdi. «Elbasy maqalasynda bilim sapasyna aıyryqsha kóńil bólinip otyr. Bilim – bolashaqtyń joly. Ondaǵy pragmatızm máselesi búgin qazaq halqy úshin óte mańyzdy nárse. Ýaqyt pen qarjynyń ysyrapshyldyǵyn joıý kerek. Latyn qarpine kóshý týraly 2012 jylǵy Elbasy usynǵan strategııasynda aıtsa, rýhanı jańǵyrýdy Nursultan Nazarbaev 1993 jyly Ordabasynda úsh eldiń basshysy jınalǵan úlken jıynda tilge tıek etken edi. Sodan bıyl naqty qujat mándes maqalasy jaryq kórdi. Bul asyqpaǵan da, keshikpegen de oń bastama», dedi Marhabat Baıǵut.
Al Nesipbek Dáýtaıuly Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynyń ult úshin nesimen mańyzdy ekenin aıtty: «Jalpy alǵanda, bul baǵdarlamalyq maqala «Qazaq qalaı ómir súrip jatyr? Rýhanı dıdary qandaı? Erteńi ne bolmaq?» degen saýaldarǵa jaýap beretin qadamdarǵa bastaıtyn tetik. Osy maqalada alǵa qoıylǵan mindetterdi múltiksiz atqarsaq qana, jańaǵy suraqtardyń jaýabyn tabamyz. Bul jastar úshin, bolashaq úshin jasalǵan saıası qadam. Álemde ekonomıkalyq jaqtan da, mádenıet jaqtan da alǵa ozǵan memleketterdi bıikke súıregen úsh nárse: Bilim. Mádenıet. Tártip. Álemniń mańyzdy kitaptaryn qazaq tiline aýdarý, qazaqtyń úzdik shyǵarmalaryn alty tilge aýdarýdy aıtqanda Elbasy osy úsh máseleni bir-aq qamtyp otyr».
Jıynǵa qatysqan ustazdar rýhanı jańǵyrý úshin mektep oqýlyqtaryn túzeý kerektigin aıtsa, ardagerler jastardyń tártibi men tárbıesin áńgimeniń ózegi etti. Taıaý jyldarda atqarylatyn jumystardy naqty qadap aıtqan Elbasynyń tapsyrmalary óz deńgeıinde oryndalar dep senimiz.
Baǵashar TURSYNBAIULY,
«Egemen Qazaqstan»
