«Bıylǵy maýsymnyń ereksheligi - maýsym aıynyń ortasynda Esil ózeninde túngi serýendi uıymdastyrýdy kózdep otyrmyz. Bul tasymaldyń qosymsha qýaty men kólemin arttyrady. Sáıkesinshe, bizdiń kásiporynnyń qyzmetine kóp adam júgine alady», - dedi medıa ortalyqtyń tilshisine bergen suhbatynda «Esil Astana» MKQK dırektory Qanat Alın.
Sondaı-aq ol bıylǵy Esildegi keme maýsymy 11 mamyrda bastalǵanyn aıtty. Qala turǵyndary men qonaqtaryna syıymdylyǵy ártúrli 6 jolaýshylar teplohody qyzmet etedi. Túngi tasymal kezindegi jaılylyq pen qaýipsizdik maqsatynda jolaýshylar kemelerinde jaryqtandyrý quraldarymen jabdyqtalǵan arnaıy navıgasııalyq belgiler ornatylady. Bılet baǵasy ózgerissiz burynǵy qalpynda qaldy. Balalar úshin – 500, úlkender úshin 1000 teńge. Jalpy, kemedegi serýen qyzmetin shamamen 20 myń jolaýshy paıdalanady.
«Jaqynda jańa teplohod satyp alyndy. Jańa tıegish katerge «Batyr» degen ataý berdik. Bul bizdiń keme parkimizdegi teplohodtardyń ishindegi eń myqtysy deýge bolady. Ol ótken jyly satyp alynǵan barjdy tirkep súıreýge múmkindik beredi. Ári ekologııalyq talaptardy saqtaı otyryp, Esil ózeni arnasyn tazartýǵa múmkindik beredi», - dedi Q.Alın.
