Apparat keńesinde aımaqtaǵy jol jóndeý jumystarynyń jáne dene shynyqtyrý men sportty damytýdyń barysy týraly máseleler qaraldy.
Kún tártibine saı oblys ákimi jınalǵandarǵa jolaýshylar kóligi jáne avtomobıl joldary basqarmasynyń jańa basshysy Jolaman Bákishevti tanystyryp, qyzmetine tabys tiledi. Osy basqarma basshysynyń orynbasary Dýdar Saǵıtovtiń jasaǵan baıandamasynda oblysta 7890 shaqyrym jol bary aıtyldy. Onyń 2260 shaqyrymy respýblıkalyq, 2665 shaqyrymy oblystyq mańyzǵa ıe. Osy kúni bul joldardyń birazy jóndeýdi talap etedi.
2017 jyly basqarmaǵa osy maqsatqa 11,7 mıllıard teńge qarjy bólindi. Onyń 5 mıllıardqa jýyǵy respýblıkalyq, qalǵany oblystyq bıýdjetten bólinip otyr. Bul qarjyǵa 177,7 shaqyrym jergilikti mańyzdaǵy joldar jóndelýi tıis. Bul jumys bes baǵdarlama aıasynda júzege asyrylmaqshy. Sonyń ishinde Astananyń irgesindegi eldi mekenderdi jáne Shýchınsk-Býrabaı kýrortty aımaǵyn damytýǵa qatysty jumystar erekshe oryn alady.
Baıandamashy osy jumystardyń barlyǵyn egjeı-tegjeıli aıta kele, oblys ákiminiń qoıǵan saýaldaryna da jaýap berýine týra keldi. Aımaq basshysy ásirese, joldardy jańartýǵa jáne jóndeýge bólingen qarjynyń tıimdi jumsalyp, tolyq ıgerilýine basa ekpin qoıdy.
Sonymen qatar, oblystyq dene shynyqtyrý jáne sport basqarmasynyń basshysy Nadejda Patıýtkınanyń da baıandamasy tyńdaldy. Onyń aıtýynsha, ótken jylǵa qaraǵanda jańadan 71 sport qondyrǵysy iske qosylǵan eken. Baıandamashy aımaqta keıbir sport túrleriniń damymaı otyrǵanyn aıtyp, shetten shaqyrylatyn jattyqtyrýshylarǵa páter bolsa degen tilegin jetkizdi. Jergilikti «Oqjetpes» komandasynyń stadıonyn jóndeý máselesi de sóz boldy.
Keńesti qorytyndylaǵan aımaq basshysy stadıonnyń qaıta jańartylatynyn atap ótti.
