EKSPO-2017 kórmesiniń qarsańynda uıymdastyrylǵan sýretshiniń jeke kórmesine elordalyq zııaly qaýym ókilderi molynan jınaldy. Kórmeni Mádenıet jáne sport mınıstri Arystanbek Muhamedıuly ashty. Al Syrtqy ister mınıstri Qaırat Ábdirahmanov, akademık Myrzataı Joldasbekov, Cenat depýtaty Birǵanym Áıtimovalar sýretshiniń óneri týraly óz oılarymen bólisti.
Áıgili sýretshiniń jeke kórmesi elordadaǵy Ulttyq mýzeıde ótti. Kórme ne úshin «Bes kún» ataldy? Nege ony anasyna arnady? Qoltańbasynyń daralyǵymen, boıaýynyń aıqyndyǵymen erekshelenetin sýretshiniń dúnıege, tirshilikke, adamı qarym-qatynastarǵa degen kózqarasyna anasynyń yqpaly zor bolǵan sııaqty.
Sýretshi bylaı deıdi: «Anam marqum ómir boıy emshilikpen aınalysty. Uldar edi esimi. Ol kezde biz balamyz. Kúnde tańerteń uıqydan turyp, tańerteńgi sháıdi isheıik desek, úıde keminde 10-15 beıtanys kisi otyrady. Biz otbasy bolyp ońasha sháı iship kórmeppiz. Anam aıtatyn adamdar arasyndaǵy qarym-qatynas, jaryq dúnıe men o dúnıe týraly áńgimeler qulaǵymda qalyp qoıypty. Kórmedegi jumystarym osy taqyryptyń aınalasynda».
Degenmen, sýretshiniń ózi bes kúnge tolyqtaı túsinikteme bergen joq. Bizdińshe, sýretshi «bes kún» arqyly sózdik qorymyzǵa turaqty tirkes bop engen «bes kún jalǵandy» beınelegen bolar?! Ol sondaı-aq, osy ómirdegi áıeldiń mıssııasyn erekshe sezimtaldyqpen, pálsapashyldyqpen boıaý tiline kóshirgen. Ol beınelegen keıipkerlerdiń barlyǵy da túrli-túrli kóńil-kúımen ózine baýraıdy. Bir sýrettegi ana, ekinshi bir sýrettegi kelin, úshinshi bir «Aspanǵa ushý» atty sýrettegi jas boıjetken, «Renish», «Úmit», «Ajyrasý» ne «Alǵashqy mahabbat», «Jas jubaılar» atty polotnolardaǵy keıipkerlerdiń barlyǵy da sezimtal, sergek, ómirge qushtar beıneler.
Kórmeden alǵan áserimen Májilis depýtaty Saýytbek Abdrahmanov bylaısha bólisti:
«Kórmeniń atynyń ózi kóp-kóp oıǵa qaldyrady. Abaıdyń «Ýaıym – er qorǵany, esi barlyq. Qıyny bul dúnıeniń – qoly tarlyq. «Ehe-ehege» elirme bozbalalar, Bul bes kúndik bir maıdan er synarlyq» degen sózi bar. Erbolattyń anasy da ulyna : «Bul bes kúndik dúnıe, ótedi de shyǵady», dep aıtyp otyrady eken. Sýretshi kórmesi osy bes kúndik (aptaǵa da tolmaıtyn!) dúnıeniń san syryn san qyrynan aıqara ashyp berýimen júrek tolqytady.
Aıgúl SEIILOVA,
«Egemen Qazaqstan»
