Kúrke lageriniń syıymdylyǵy - 300 adam, ár kúrkede 4 adamnan. Jaz maýsymy kezinde EXPO-Camp 8-den 21 jasqa deıingi 2000-nan astam adamdy qabyldaýǵa daıyn.
- Lager baǵdarlamasy bir aptaǵa josparlanǵan, ár dúısenbi saıyn qabyldaıdy. Bizde eki jas sanaty bar, trenıngterdiń qıyndyǵyna baılanysty 8-17 jas aralyǵy jáne 14-21 jas. Mundaı lagerdi qurý ıdeıasy Qazaqstan EXPO kórmesin ótkizý mártebesine ıe bolǵan tusta paıda boldy. Skaýttar bizge Koreıadan keledi ári Germanııadan da top kútip otyrmyz, - deıdi Qazaqstan skaýt qozǵalysynyń prezıdenti Ildar Katenov.
EXPO-Camp baǵdarlamasy 12 taqyryptyq maýsymǵa baǵyttalǵan: «Tómen kómirtekti damytý», «Klımattyq ózgerister», «Bolashaqtyń agrotehnologııasy», «Ekologııalyq turaqtylyq», «Jasyl tehnologııalar», «Energııa únemdeıtin tehnologııalar», «Jasyl ekonomıka negizderi», t.b.
– Lagerdi Arnasaıda ashýdyń óz sebebi bar: munda logıstıkalyq ınfraqurylym jaqsy damyǵan ári qalaǵa qatynaý jeńil. Bastysy munda 2015 jyldan beri 35 «jasyl» ádistemeni sátti júzege asyryp otyrǵan «jasyl» tehnologııa ortalyǵy jumys isteıdi. Balalarǵa «jasyl» ekonomıkanyń ne ekenin tájirıbe arqyly kórsetip, úıretýdi josparlap otyrmyz, - deıdi Ildar Katenov.
Lager aýmaǵynda jylyjaı jáne balyq ósiretin tálimbaq bar. Al Arnasaı Qazaqstandaǵy alǵashqy «jasyl aýyl» dep atalady, óıtkeni jergilikti turǵyndar «jasyl» tehnologııamen organıkalyq kókónis ónimderin ósiredi.
– Bizdiń ashana máziri tek qana ekologııalyq taza ónimderden turady. Barlyq kókónis – qyzanaq, qııar, pııazdy – osynda ósiremiz. Tańerteńgi as ta jergilikti úı sútinen ázirlenedi, - deıdi uıymdastyrýshylar.
Lager tárbıelenýshileri nusqaýshylardyń jetekshiligimen oqytylady: qazir EXPO-Camp-da 22 úılestirýshi jumys istep jatyr – ár jasaqqa ekeýden. Olar halyqaralyq sertıfıkat alǵan nusqaýshylar, respýblıkalyq deńgeıdegi mamandar, sondaı-aq, pedagogıkalyq tájirıbeni meńgergen Astana qalasynyń pedagogıkalyq, polıtehnıkalyq, gýmanıtarlyq kolledj stýdentteri.
– Skaýt ádisine saı bala men tálimgerdiń jas aıyrmashylyǵy 2-3 jas bolýy tıis. Sebebi olar bir-birlerimen tyǵyz baılanysyp, bir komanda quramynda bolady. Munda barlyǵy ózin-ózi basqarýǵa negizdelgen: nusqaýshylar balalardyń oılaǵanyn júzege asyrýǵa kómek beretin úılestirýshi retinde jumys jasaıdy. Olar bolashaqta óz betterimen sheshim qabyldaı alýlary úshin biz olarǵa tańdaý quqyǵyn beremiz, - deıdi Ildar Katenov.
EXPO-Camp lagerin qurýǵa G-Global halyqaralyq hatshylyǵy, «jasyl» ekonomıka jáne G-Global damytý koalısııasy, «Aqbota» QQ, «Qazaqstannyń skaýt qozǵalysy» QB bastama boldy.
