– Bul sizdiń kópten kútken ári eń mańyzdy jekpe-jegińiz ǵoı?
– Álbette solaı. Bul kezdesýdi kútip júrgenime eki jyldyń kólemi bolyp qaldy. Endi sol kúndi asyǵa kútip júrmin.
– «Kanelo» sekildi soqqysy kúshti boksshymen kezdesip pe edińiz?
– Joq, men judyryqtasqan chempıondardyń arasynda Alvares sekildi myqty boksshy bolǵan emes.
– Oǵan qarsy qalaı daıyndalmaqsyz?
– Bapkerim Abel Sanchestiń qurǵan jospary bar. Sondyqtan jattyǵýymda «Kanelonyń» stıline baılanysty ózgerister de bolyp qalýy múmkin. Saýl ekeýimiz tórt jyl buryn birge jattyqqanbyz. Bir-birimizdi bilemiz.
– Estýimshe, sizder sparrıng ótkizdińizder ǵoı? Ony nokaýtqa túsire aldyńyz ba?
– Iá, shamamen tórt jyl buryn jattyǵý kezinde kúsh synasqanymyz bar. Ol myqty boksshy. Sparrıng kezinde ony nokaýtqa túsire almadym, biraq 16 qyrkúıekte nokaýtqa jiberem dep oılaımyn.
– Demek, bul jekpe-jek nokaýtpen aıaqtalady dep oılaısyz ǵoı? Álde jeńimpaz tóreshilerdiń sheshimimen anyqtala ma?
– Ol jaǵyn bilmeımin. Bul boks. Ekeýimiz úshin úlken jekpe-jek bolmaq. Alvares te, men de naǵyz drama kórsetýge umtylamyz dep oılaımyn.
– Alvares ózińizdeı soqqysy kúshti boksshymen kezdesti me?
– Joq, olaı oılamaımyn.
– Soqqylaryńyzdy sezingende ol tań qalady dep oılaısyz ba?
– Qatty tań qalaryna senimdimin (kúldi).
– «Kanelonyń» kishi Hýlıo Sezar Chavespen ótkizgen jekpe-jegi jaıly qandaı oıdasyz? Bul kezdesýde onyń osal tustaryn baıqadyńyz ba?
– Bul keshte múldem basqa nárseni oıladym. «Kanelo» ony soqqylarynyń astyna alǵanmen, nokaýtqa túsirmedi. Maǵan osy jaıt azdap túsiniksizdeý boldy. Kishi Chavesti qulatý kerek edi dep oılaımyn.
– Alvares-Chaves kezdesýinde bir baıqaǵanymyz, raýnd arasyndaǵy úzilisterde «Kanelo» oryndyqqa otyrmady. Beıne bir jekpe-jekti dem almaı aıaqtaýǵa bolatynyn kórsetkisi kelgendeı boldy.
– Onysy kloýnada ǵoı. Boıyna syımaı bara jatsa, kúshin kelesi raýndta kórsetý kerek edi. Birinshi raýndta bolmasa, ekinshi raýndta qarsylasyn esinen tandyryp tastasyn. Sonda moıyndaýǵa bolady.
– Sizdi Qazaqstanda mańyzdy sharalar kútip tur. Bıyl ol jaqta Halyqaralyq EKSPO kórmesi ótedi. Kórmeniń elshisi mindetin atqarasyz. Bul siz úshin úlken mártebe bolar?
– Árıne. Mundaı aýqymdy sharany ótkizýdiń mańyzy zor. Kórmede sońǵy ekologııalyq tehnologııalar, jańa energııanyń kózderi tanystyrylady. Osynyń bárin búkil álemge tanystyrý múmkindigi paıda bolǵanyn maqtan tutamyn.
– Qazir jankúıerler arasynda kishi Floıd Meıýezer men Konor Makgregor aıqasy qyzý talqylanyp jatyr. Olardyń aıqasy Alvares ekeýińizdiń jekpe-jegińizge básekeles bolmaı ma? Meıýezer-Makgregor kezdesýine qaraǵanda Golovkın-Alvares jekpe-jegi ne úshin mańyzdyraq?
– Sebebi, bizdiki naǵyz jekpe-jek. Menińshe, Meıýezer-Makgregor keshinde eshqandaı ıntrıga joq. Bul Konor úshin tıimdi bolary sózsiz. О́ziniń otbasyna, bolashaǵyna qajet kóbirek aqsha tabady. Biraq sport jaǵynan alyp qaraǵanda eshqandaı qyzyq joq.
– Sharshy alańda kishi Meıýezermen kezdesýińiz múmkin be?
– Joq, olaı oılamaımyn. Sebebi, bul múmkin emes.
– Al ary qaraı ne bolmaq? «Kanelomen» ótetin kezdesýden keıin qandaı josparyńyz bar?
– Aldymyzda eki jol tur. Biri – revansh ótkizý, al ekinshisi men orta salmaqtaǵy barlyq belbeýge ıelik etkim keledi. Bul meniń armanym.
