Memorandýmǵa sáıkes, «Jasyl oram» keshenin EKSPO-2017 obektileriniń biri retinde engizý týraly sheshim qabyldandy.
«Jasyl oram» kesheniniń «Samuryq-Qazyna» jyljymaıtyn múlik qory» AQ, «ATF Banki» AQ jáne BI Group qurylys kompanııasy arasynda memlekettik-jekeshelik áriptestik sheńberinde Memleket basshysynyń bastamasymen salynǵanyn atap ótý jón.
«Jasyl oram» kesheniniń negizgi ıdeıasy – Astana qalasynyń aýa raıy jaǵdaılaryn eskere otyryp, ekologııalyq turaqty qala aýdanyn salý. Tujyrymdamany álemdegi 10 úzdik sáýlet-jobalyq kompanııalar tobyna kiretin AEDAS kompanııasy usyndy.
EKSPO-2017 kórmesiniń biri retinde qabyldanǵan «Jasyl oram» keshenin tanystyrǵan «Samuryq-Qazyna» JMQ» AQ Basqarma basshysy Arman Jetpisbaı bul keshenniń tıimdiligi týraly aıtty.
– Bul oramnyń eń basty artyqshylyǵy – energııa únemdeýi men ekologııalyq talaptarǵa saı bolýynda. Naryqtaǵy baspana baǵasynan qymbat bolǵanymen, bul turǵyn úı kesheninde turatyndar kommýnaldyq shyǵyndardan 22 paıyzǵa deıin únemdeı alady, deıdi Arman Jetpisbaı.
«Jasyl oram» – LEED Campus Group sertıfıkattaýynan ótken TMD aýmaǵyndaǵy birinshi keshen. Onyń biregeıligi – sertıfıkattaýdan jeke turǵan ǵımarat emes, bir keshenge biriktirilgen ǵımarattar toby ótti.
EKSPO kórmesin ótkizý kezeńi ishinde birinshi otandyq elektr avtobýstarmen «Jasyl oram» obektisine deıin tegin baǵyt uıymdastyrylady. Elektr avtobýstar qazaqstandyq ınjenerler men «Higer» álemdik avtogıgantynyń birlesken jobasy.
Elektr kóliktiń atalǵan túrin paıdalaný, sondaı-aq qurylysta «jasyl» tehnologııalardy qoldaný Qazaqstanda ekologııa jáne energııa tıimdiligi qaǵıdattaryn naqty iske asyrýdyń aıqyn mysaly bolyp esepteledi.
Arnur ASQAR,
«Egemen Qazaqstan»
