Keshe L.N.Gýmılev atyndaǵy Eýrazııa ulttyq ýnıversıtetiniń jýrnalıstıka jáne saıasattaný fakýltetiniń 1 kýrs stýdentteri «Egemen Qazaqstan» gazeti basshylarymen ótken sheberlik-synybyna qatysty. Jas qalamgerler «Egemen Qazaqstan» respýblıkalyq gazeti» aksıonerlik qoǵamynyń prezıdenti Saýytbek Abdrahmanovqa ózderin tolǵantqan saýaldardy tossa, jýrnalıstıka maıtalmandary bastan keshken qyzyqty oqıǵalary men qalamgerlik kásiptiń qyr-syry jaıynda áńgimelep berdi.
Jýrnalıstıkada bilim men tájirıbeni qatar alyp júrgen adam ǵana óz kásibiniń naǵyz sheberi bolatynyn qazaq baspasózinde abyroıly qyzmet atqarǵan nebir tulǵalardyń eńbek jolynan paıymdaǵan jaıymyz bar. Sol aıtqandaı, osy úrdisti L.N.Gýmılev atyndaǵy Eýrazııa ýnıversıtetiniń jýrnalıstıka jáne saıasattaný fakýlteti úzilmes dástúrge aınaldyryp, jastardyń respýblıkalyq buqaralyq aqparat quraldarynyń tynys-tirshiligimen etene tanysýyna qashanda qoldaý kórsetip otyratyny súısintedi.
Qarashańyraqtyń tabaldyryǵynan attaı bergen adamnyń kóńilin oń qaptaldaǵy basylymnyń 35 basshysy beınelenip, ortasyna el Prezıdenti Nursultan Nazarbaevtyń tulǵasy kestelengen kartına erekshe áserge bólep, tarıhtyń syrshyl shejiresin paraqtap shyqqandaı kúıge túsiretini ǵajap. Osynaý keshegi júrip ótken belesterdiń árbir shyńy men quzyn sazdy boıaýmen baıandaıtyn qylqalam týyndysynyń dúnıege kelýine uıytqy bolǵan basylym basshysy S.Abdrahmanov qazaq halqynyń kil birtýar azamattary basqarǵan gazettiń 90 jyldyq merekesine oraı ilingen kartınany tamashalaǵanda Elbasynyń aıtqan lebizin jastarǵa qyzǵylyqty áńgimelep berdi. Jastar basylym týraly jan-jaqty maǵlumat alǵysy keletin bolsa, gazettiń 80-90 jyldyq mereıtoılaryna arnalyp shejire-kitaptary jaryq kórgen, sonda derekter molynan keltirilgeni baıandaldy.
Qazaq ádebıetiniń kórnekti ókili, aqyn Ábdilda Tájibaev óziniń gazettegi eńbek jolyn on bes jasynda Qyzylordanyń kóshelerinde jurtqa gazet satýdan bastaǵanyn bireý bilse, bireý bilmeýi múmkin. Onyń tarıhyndaǵy osyndaı oqıǵalarǵa qaramastan, jýrnalıstıkany taza shyǵarmashylyq jumys dep sanaıtyndar qatelesedi. Jýrnalıstıka degenimiz eń aldymen kásip deıtin paıym alǵa tartyldy.
Stýdentter tarapynan búginde elimizde baǵyt-baǵdarlary ár túrli aqparat quraldary jumys istep jatyr, al biraq bilim ordasyn bitirip shyqqan jastar erteń olardyń talabyn qanshalyqty oryndaı alady, jýrnalısterdi ýaqytpen sanaspaı jumys isteıdi deıdi, al olardyń materıaldyq jaǵdaıy soǵan saı ma, qazaq basylymdarynan orys tildi basylymdardyń salmaǵy basym degen pikirge qalaı qaraısyz, BAQ ókilderi memlekettik qyzmetker sanatyna jatpaıdy, sol sebepti turǵyn úı kezegine tura almaıdy degen sózder ras pa, degen syńaıda biraz suraqtar qoıyldy. Aksıonerlik qoǵam prezıdenti jýrnalıstıka jáne saıasattaný fakýlteti bárinen buryn kásipke beıimdeıtin, jastardyń dúnıetanymyn qalyptastyratyn, qalamgerlik sheberligin ushtaıtyn, jýrnalıske qajetti bilim beretin shańyraq dep jaýap berdi.
Aksıonerlik qoǵam prezıdenti qazaq basylymdary orys tildi gazetterden qaı jaǵynan da kem túspeıtinin, biraq, ras, reseılik telejýrnalıstıka men qazaq telejýrnalıstıkasyn salystyrǵanda áli olardan úırenetin kóp tustar bar ekenin jetkizdi. Jýrnalıstıka – táýelsiz kásip, sondyqtan da onyń eshqandaı sheńberge syımaýy zańdy, al turǵyn úı kezegine kelsek, tek memlekettik qyzmetkerler ǵana kezekke tura alady degen jańsaq pikir, munda jalpy kópshilik halyqqa arnalǵan tizim de bar, dedi.
Sheberlik synybyna qatysýshylar atynan Eýrazııa ýnıversıtetiniń oqytýshysy Raýan Kemerbaev «Egemen Qazaqstannyń» basshysyna maǵynaly áńgimesi úshin rızashylyq bildirdi. Bas basylymǵa alǵash ret bas suqqan jastarǵa syı-sııapat jasalyp, «Elbasy», «Saltanat» jınaqtary tapsyryldy.
Qarashash TOQSANBAI.
Sýretterdi túsirgen Orynbaı BALMURAT.
