Baspasóz máslıhaty bastala sala jýrnalıster Djekı Channan Dımash Qudaıbergenmen kezdesý týraly surap, Djekıdiń Dımash týraly oıyn bildi. «Kezdeısoq teledıdarymdy qosyp qalsam, Sizderdiń talantty ánshilerińiz óleń aıtyp jatyr eken. Onyń ónerine, ózindik erekshe daýysyna tań qaldym. Keıinirek bilsem, ol meniń jankúıerim eken. Dımashpen tanysyp, kezdeskenime qýanyshtymyn. Buıyrsa, ol kıno áleminiń úlken juldyzy bolady», - deıdi Djekı.
Sondaı-aq, ol jýrnalısterdiń «Qazaqstanda kıno túsirý oıyńyzda bar ma?» degen suraǵyna akter elimizde kıno túsirý josparynda bar ekenin, biraq, ýaqyttyń tapshylyǵy qol baılaý bolyp turǵanyn aıtady. Degenmen, bolashaqta mindetti Qazaqstanda kıno túsiretinin jetkizdi.
Álemdi moıyndatqan maıtalman akter bolýynyń basty sebebi retinde Djekı Chan tynbaı eńbektenýdi, bos nársemen aınalysýdan, máselen, ınternette otyrýdan, árkimniń ómirin ańdyp otyrýdan qashýdy jáne ózińnen áldeqaıda jaǵdaıy tómen jandarǵa qaıyrymdylyq jasaýdy atap kórsetti.
– Men osy deńgeıge bir kúnde jetken joqpyn. Bárine óz ýaqytymen, tájirıbe arqyly qol jetkizdim. Mende bir kınony túsirip bolǵasyn demalý degen joq. Kıno túsirý, rólde oınaý, onyń ssenarıin jazý, eń aıaǵy mýzykasy men dybysyn tekserip, montaj jumysymen aınalysýdan lázzat almasam, sharshaǵan emespin, – deıdi ol.
Beıjińde kýng-fý boıynsha jattyǵýlar júrgizip júrgen akter aldaǵy ýaqytta Qazaqstanda da kýng-fý mektebin ashýǵa nıetti. «Bolashaqta álemniń barlyq elinde kýng-fý mektepterin ashqym keledi. Múmkin Qazaqstanda da ashylyp qalar», - dedi Djekı Chan.
Jýrnalıstermen kezdesýden soń Djekı Chan Qazaqstan-Qytaı kınofestıvaliniń ashylý saltanatyna qatysyp, otandy súıýge, otanshyldyqqa baýlıtyn Qytaı tilindegi «Otan» ánin shyrqap berdi. Djekı Channyń áninen keıin sahnaǵa Dımash Qudaıbergen shyǵyp, «Singer» jobasynda shyrqaǵan «Kúzgi muń» ánin qytaısha oryndap berdi.
Eske sala keteıik, Astanada 7-18 maýsym aralyǵynda ótetin Qytaı kınofestıvali aıasynda elordalyqtar men qala qonaqtary «Ile ózeni», «Shynaıy mahabbat», «Gúlim», «Qaterli isik myrza, ketińiz», «Qasqyr totemi» syndy týyndylardy tamashalaı alady.
Álı BITО́RE,
«Egemen Qazaqstan»
