Shet eldiń bilikti dárigerleri – Aqtóbede

Olar aýyr jaraqatty ke­shendi túrde emdeýdiń búgingi zamanǵy tujyrymdamasyn tal­qylady. AQSh, Ońtústik Koreıa, Germanııa, Qytaı, Túrkııa, Reseı, Qazaqstan jáne taǵy basqa da taıaý shet elderdiń dáriger-hırýrgteri, travmatolog pen ortoped mamandary bas qosqan jıyndy Qazaqstanda ótkizý qa­jettiligi qaıdan týyndady? Bul saýaldyń jaýabyn qan­dasymyz, AQSh-tyń Mıssýrı shtatyna qarasty Sent Lýıs klı­nıkasynyń bas dárigeri, pofessor, medısına ǵylymynyń doktory Joldas Quljanov ber­di. Ol ortoped-hırýrg maman re­tinde osy saladaǵy memleketter ara­syndaǵy salystyrmaly derek­terge únemi nazar aýdaryp júretinin aıta kelip, Qazaqstan aýyr jaraqattar alý kórsetkishteri boıynsha álem­degi memleketterdiń alǵash­qy úshtigine kiretini jó­nindegi derekti alǵa tartty. Degenmen, búgingi za­manǵy dıag­nos­tı­kalyq emdeý tásilderi aýyr ja­raqattanǵan adamdardy ólim­nen arashalap qalýǵa múm­kindik beredi deýge bolady. Shet el dárigerleri Aqtóbe qalasynda osy máseleni ortaq áń­gimeniń arqaýyna aınaldyrdy. 
Halyqaralyq ıntegrasııa sıpatyndaǵy kezdesýler kezinde aıtylǵandaı, travmatologııa men ortopedııa salasyndaǵy búgingi ozyq tehnologııalar aýyr jaraqatty emdeýdiń deńgeıi men sapasyn jaqsartýǵa ájeptáýir yqpal jasamaq. Árıne, bul úshin eń aldymen onyń qyzmeti jedel ári tıimdi túrde uıymdastyrylýy tıis. Osy turǵyda álemdegi ozyq elderdiń densaýlyq saq­shylary jaraqattan saý-tam­tyǵy qalmaǵan aǵzany, sonyń ishinde jambas jáne aıaq-qol súıek­teriniń jáne basqa da zaqym kelgen múshelerdi qalaı qalpyna keltirýge bolatyny jónindegi tájirıbelerin orta­ǵa saldy. Sondaı-aq, olar kúr­deli otalar jasaýǵa qatysyp, she­berlik sa­baqtar ótkizdi. Sony­men birge, súıekterdiń zaqym­danýynan zardap shegip júrgen óńir turǵyndaryna jáne klınıkalarda emdelip jatqan naý­qastarǵa tegin keńes berdi. Obl­ys ákimi  Berdibek Saparbaev pen AQSh-taǵy ortopedııalyq gospıtaldyń jetekshisi Joldas Qul­janov jáne Qytaıdaǵy Shyń­jan-Uıǵyr avtonomııaly ob­lysyndaǵy halyqtyq gospıtaldyń travmatolog dári­geri Mıao Sıýagangom ózara ynty­maqtastyqty damytý jónindegi memorandýmdarǵa qol qoıdy. Osyǵan oraı aýyr jaraqattardy emdeý men qalpyna keltirý jónindegi birlesken is-sharalar kesheni júzege asyrylmaq. Bul úshin taraptar jumys toptaryn quryp, yntymaqtastyq tetigin ázirleý jáne ony odan ári jetildirý men damytý jóninde úılestirýshi organdar qurý týraly uıǵarymǵa kelip otyr. 

Temir Qusaıyn,
«Egemen Qazaqstan»

Aqtóbe