О́tken jylmen salystyrǵanda eki ese kóp bala qatysqan saıys qazirdiń ózinde onshaqty jeńimpazdy anyqtap úlgerdi.
Aqtaýdaǵy N.Jantórın atyndaǵy Mańǵystaý oblystyq mýzykalyq drama teatrynda ótken kastıngke óńirdiń barlyq aýdan-qalalarynan 7 men 13 jas aralyǵyndaǵy 100-den astam bala qatysty.
Bir kúnge sozylǵan irikteý kezeńiniń ońaı bolmaǵanyn aıtady uıymdastyrýshylar. Dodada óziniń talantymen, ózine degen senimdiligimen, sahnaǵa degen beıimdiligimen 7 jasar Ánnur Qýantqanov júldeger bolyp shyqty.
Myqtyny anyqtaýda qazylarǵa ánshilerdi uzaq tyńdap, biraz pikir talastyrýǵa týra kelgen. Nátıjesinde, barlyq talaptarǵa saı dep tanylǵan Ánnurdyń baǵy jandy. Ánshi Ánnurdyń ákesi boks jattyqtyrýshysy, al bıge jáne akterlik sheberlik kýrsyna qatysatyn balaqaıdy án aıtý ónerine, ıaǵnı vokalǵa úıde anasy daıyndaıdy.
Kastıngke Mańǵystaýǵa kelgen tálimger – ánshi, Qazaqstannyń eńbek sińirgen qaıratkeri Tolqyn Zabırova ánshi balaqaıdyń bolashaǵyna senimdi.
− Aqtyq synda Ánnurdyń óz Mańǵystaýynyń mártebesin kóterip, baıqaýdyń kishkentaı jaryq juldyzdarynyń biri bolatynyna senemin. Sebebi onyń boıynda talant, ártistik qabilet, óz-ózine degen senimdilik pen tabandylyq bar. Biz ekeýmiz aqtyq synǵa júıeli daıyndalatyn bolamyz, − dedi T. Zabırova.
27-29 qazan aralyǵynda «Almaty Arena» muz saraıynyń sahnasynda ár óńirdiń júldegerleri óz tálimgerlerimen birge saıysqa túsedi. Qıyn synda talapkerlerdiń arasynan shyn talantty kásibı ánshiler men telekórermender anyqtaıtyn bolady.
Gúlaıym Shyntemirqyzy,
«Egemen Qazaqstan»
Mańǵystaý oblysy
