«Búgin aıtýly oqıǵa bolyp jatyr. Biz eń iri kún elektr stansııasynyń qurylysyn bastap jatyrmyz. Bul bizdiń aımaqtyń EKSPO-ǵa syılyǵy, - dedi ashylý saltanaty barysynda Qaraǵandy oblysynyń ákimi Erlan Qoshanov. – Investorlarǵa, seriktesterimizge jobalaryn júzege asyrýda Qaraǵandy aımaǵyn tańdaǵandary úshin alǵysymdy bildirgim keledi. Jańartylǵan energııa kózderin damytý – ol Elbasynyń tapsyrmasy. Búgingi tańda oblysymyzda biz sol tapsyrmany oryndaý úshin alǵashqy qadamdar jasaýdamyz».
Aımaq basshysy úlken daıyndyq jumystary jasalǵanyn atap aıtty. Qazirgi ýaqytta zańdyq jáne qarjylyq máseleler sheshilgen, barlyq ruqsat prosedýralary oryndaldy. Kún elektr stansııasynyń qurylysyna 160 ga kóleminde jer ýchaskisi bólingen. Jobanyń tehnıkalyq negizdemesi qurylyp, saraptama qorytyndysy alyndy. «KEGOC» AQ-men birge qýat shyǵarý nusqasy quryldy jáne quptaldy, qosýdyń tehnıkalyq sharttary alyndy.
«Bizdiń ınvestorlar úshin buǵan jetýdiń joly kúrdeli jáne uzaq boldy, olar bes jyldan artyq ýaqyt jumsady. Bul istiń logıkalyq sońy osy jerde Ortalyq Azııadaǵy eń úlken kún elektr stansııasy iske qosylǵanda bolady»,- dedi Erlan Qoshanov.
Investorlardyń aıtýynsha qazirgi ýaqytta qurylystyń bastalýyna barlyǵy daıyn. Joba bastamashylary Qazaqstanda kún energetıkasyn damytý úshin barlyq jaǵdaı bar deıdi. Qajetti aýmaqty tańdaýda jergilikti bıliktiń qoldaýy mańyzdy ról atqarǵan eken.
«Bul jobany sátti júzege asyrýǵa baılanysty barlyq negizgi máseleler sheshilgen. Biz búgin kún elektr stansııasynyń qurylysyn bastadyq, ony 2018 jyly aıaqtaýdy josparlap otyrmyz. Bizdiń elektr stansııamyz qazaqstandyqtardyń ómir sapasyn joǵarylatýǵa septigin tıgizetinine senimdimiz. Birinshiden, bul «jasyl» tehnologııalar jáne qorshaǵan ortany lastanýdan saqtaıtyn ádis. Ekinshiden, jańa jumys oryndarynyń ashylýy», - dedi jobanyń bas ınvestory Iаn Zonnenshaın.
Úkimet qaýlysymen anyqtalǵan turaqty baǵaǵa elektr energııasyn satyp alý elektr stansııasyna kórsetiletin memlekettik qoldaý bolyp esepteledi. О́z kezeginde aımaǵymyz tikeleı shet eldik ınvestısııa men qosymsha taza elektr energııasyna qol jetkizedi.
Belgilengen jer aýmaǵynda 370 myń kún panelderi ornatylady. Bir jyldyq elektr energııasynyń óndiris kólemi 145 mln kVt/s quraıdy. Stansııanyń qýattylyǵy - 100 MVt. Salystyrar bolsaq, Saran qalasy 10 ese azyraq qýat jumsaıdy.
«Bul qurylysty biz negizi 2014 jyly daıyndaı bastadyq. Sol ýaqyt aralyǵynda Qazaqstan «Jańartylǵan energııa kózderi týraly» zań qabyldady. Eýropalyq odaq tarapynan qoldaý taptyq. Jobany júzege asyrýda Qaraǵandy oblysy kezdeısoq tańdalǵan joq. Bul iri óndiristik aımaq, munda jaqsy eńbek resýrstary men qajetti negizdar bar», - deıdi bas ǵylymı keńesshi, Qazaqstan men Qyrǵyzstandaǵy Slovakııanyń buryńǵy tótenshe jáne ýákiletti elshisi Dýshan Podgorskı.
Mıras Asan,
«Egemen Qazaqstan»
Qaraǵandy oblysy
