Kelissóz barysynda Qazaqstan Prezıdenti Qytaı Tóraǵasymen osy jyldyń ishinde úshinshi márte kezdesip otyrǵanyn, bul eki el arasyndaǵy yntymaqtastyqtyń barynsha joǵary ekenin bildiretindigin basa aıtty.
«Bizdiń kezdesýlerimiz, senimge toly baılanysymyz Úkimetterimiz, mınıstrlikterimiz ben vedomstvolarymyz arasyndaǵy qarym-qatynastyń barlyq spektorlaryna yqpal etip, kómektesedi. Eger qysqasha qorytyndy shyǵarar bolsaq, Qazaqstan men Qytaı qarym-qatynasy – bul úlgi bolarlyq memleketaralyq qarym-qatynas. Bizde sheshilmegen másele joq. Týyndaıtyn kez kelgen másele sheshiledi», dedi Nursultan Nazarbaev.
Memleket basshysy Qytaıdyń tikeleı shetel ınvestısııasy, bólingen kredıtter jáne birlesken kásiporyndar boıynsha Qazaqstan ekonomıkasynyń negizgi seriktesi bolyp otyrǵandyǵyn atap ótti. Energetıkalyq yntymaqtastyq máseleleri tolyqtaı óz sheshimin tapqandyǵyn eske saldy.
«Bizdiń aramyzda barlyq deńgeıdegi jyly ári tyǵyz baılanystar qytaılyq-qazaqstandyq qarym-qatynastyń strategııalyq sıpatyn pash etedi, biz memleketter arasyndaǵy qarym-qatynastyń úlgisi bolamyz desek te bolady. Baılanystarymyz barynsha tyǵyz. Meniń osy jolǵy saparymdy tamasha uıymdastyrǵanyńyz úshin rızashylyǵymdy bildiremin. Men Beıjiń saraıy qonaq úıine ornalasyp, ózimdi úıimdegideı sezinýdemin», dedi óz kezeginde Qytaı Tóraǵasy.
Aıta keterligi, QHR Tóraǵasy Qazaqstanǵa osymen úshinshi ret resmı saparmen kelip otyr. Sapar aıasynda ol erteń ShYU sammıtine, sonymen qatar EKSPO-2017 halyqaralyq mamandandyrylǵan kórmesiniń resmı ashylý saltanatyna qatysatyn bolady.
