Atalǵan óner ujymy Astana qalasynda ótetin EKSPO-2017 Halyqaralyq mamandandyrylǵan kórmesi aıasynda 18-26 maýsym aralyǵynda óner kórsetedi. Qoıylymdar Astana Opera jáne balet teatry men Astana Jastar teatrynyń sahnasynda ótedi dep josparlanýda. Osyǵan oraı, teatr ujymy ekspo kezinde elordada kórermen nazaryna usynylatyn 7 spektakldi tanystyryp, kórmege daıyndyq jumystary men jańalyqtary jóninde BAQ ókilderine baspasóz maslıhatyn ótkizdi.
Halyqaralyq kórme aıasynda 1940 jyldan beri teatr sahnasynan túspeı kele jatqan Ǵabıt Músirepovtiń «Mahabbat dastany» shyǵarmasy alǵashqy bolyp kórermenge jol tartpaq (rej. Qaırat Súgirbekov). Bul tizimdi ary qaraı tolyqtyratyn Raqymjan Otarbaevtyń (rej. Iý. Hanıngo-Beknazar) «Sultan Beıbarysy», Muhtar Áýezovtiń áıgili «Abaı» romany (rej. Esmuhan Obaev), jas dramatýrg Madına Omarovanyń «Kómbe nannyń dámi» (rej. Alma Kákishova) atty sý jańa týyndysy, Ǵarıfolla Esimniń «Tańsulý» (rej. Alma Kákishova) qoıylymy, Ǵabıt Músirepovtiń (rej. Erik Nursultan) «Qyz Jibek» shyǵarmasy, Iran-Ǵaıyptyń (rej. Ionas Vaıtkýs) «Qorqyttyń kóri» qoıylymdary barlyq kórme qonaqtaryna mereke syılaıtyn bolady.
– Álemge tanymal aıtýly sharadan tys qalýǵa haqymyz joq. «Ekspo-2017» kórmesine arnaıy daıyndaǵan shyǵarmalarymyz bar. Repertýarymyzda burynnan kele jatqan tanymal týyndylar da joq emes. Ol jerde qoıylatyn qoıylymdardyń mán-maǵynasy, mazmuny shet elden kelgen qonaqtar men týrısterge bizdiń tól tabıǵatymyzdy, mádenıetimiz ben ádebıetimizdi, óner saltymyzdy jan-jaqty tanystyratyn birden bir shyǵarmalar. Barlyq spektaklder úsh tilge aýdarylǵan. Qoıylym qazaq tilinde júrgenimen, kelgen qonaqtarǵa aǵylshyn jáne orys tilinde qosymsha aýdarma júrip otyrady. Sondaı-aq, múmkindigi shekteýli kórermenderge arnalǵan arnaýly shyǵarylymdar daıyndalýda. Iаǵnı, shyǵarmanyń mazmuny men ıdeıasy jaıly, rólderdi somdaıtyn ártister týraly tolyq maǵlumattar beriledi. Bılet baǵalary 500 ben 1500 teńge aralyǵynda.
«Negizgi maqsatymyz – asyl muralarymyz ben rýhanı qundylyqtarymyzdy, saf ónerimizdi sheteldik qonaqtarǵa tanystyrý», deıdi teatr basshysy Erlan Bilál.
EKSPO-2017 Halyqaralyq kórmesi kezinde teatrlanǵan qoıylymdarymyz arqyly álem jurtshylyǵy tereń tarıhymyz ben injý-marjan muralarymyzdy tanyp, rýhanı nár alyp jatsa nur ústine nur.
Arman OKTIаBR,
«Egemen Qazaqstan»
