Kórgen adamǵa, kelgen adamǵa aýqymy keń, eki kúndik festıval ýaqytty keri aınaldyryp, ótken tarıhqa saıahat jasatpaq.
Bul festıvalde qaz-qatar tigilgen on eki qanatty aqshańqan 60 úı tigilip, kóshpendiler sherýi saltanat qurady. 10 memleketten kelgen at qulaǵynda oınaıtyn shabandozdar ónerdiń san túrin kórsetedi. Eń úzdik etnomýzykanttar dalany dúbirletip, kókpar tartylady. Oǵan qosa aýdaryspaq, qyz qýý, asaýǵa tusaý salý oıyndary ótedi.
Qolóner sheberleri men ustalar ismerligin pash etse, balalar alańy, altybaqan, kúı tartys kelgenderdiń kóńilin kóteredi. Qyran qus pen qumaı-tazy syndy babadan qalǵan muranyń barlyǵy osy toıdan tabylmaq. Túngi alaý basyndaǵy oıyndar da jastardy qyzyqtyra túseri sózsiz.
Uıymdastyrýshylardyń aıtýynsha, kórermender arasynan «Eń ádemi ulttyq kıim» tańdalyp, túrli ulttyq oıyndar oınalyp, san-alýan saıystar uıymdastyrylady.
Sondaq-aq, taqyryptyq sektorlar jumys isteıdi. Máselen, «Almaly» atty qolónershiler aýylynda sheberlik sabaqtary ótkiziledi. Kórermender tek tamashalap qana qoımaı, mamannyń kómegimen sazdan qumyra jasap kóredi. Al «Shabyt» mýzykanttar aýylynda baıqaý ótedi. Kórermender túrli aspaptarda oınap, baqtaryn synaıdy, ulttyq taǵamdardan dám tatyp, jasaý qupııasymen tanysady. Kásibı búrkitshiler men palýandardyń ónerin tamashalaıdy. Osylaısha, kelgen kórermender, meımandar kóshpendiler ómirin óz kózderimen kórip, turmysymen tanysady. Sondaı-aq, kórermender arasynan «Eń ádemi ulttyq kıim» tańdalyp, syılyq berilmek.
Aınash ESALI,
«Egemen Qazaqstan»
