Mártebeli meımandy elorda áýejaıynan QR Densaýlyq saqtaý mınıstri Eljan Birtanov, Astana qalasy ákiminiń orynbasary Ermek Amanshaev jáne Serbııadaǵy Qazaqstan elshisi Nurbah Rústemov kútip aldy.
Aıta keterligi, erteń keshkisin ótetin halyqaralyq mamandandyrylǵan kórmeniń saltanatty ashylý rásimine 17 eldiń memleket jáne úkimet basshylary qatysatyn bolady.
«Shanhaı yntymaqtastyq uıymy otyrysy aıaqtalǵannan keıin EKSPO-nyń saltanatty ashylýy bolady. Biz ashylý saltanatyna 17 eldiń memleket jáne úkimet basshylaryn kútip otyrmyz. Munan bólek, qatysýshy elderdiń atynan zańnamalyq organdardyń ókilderi, mınıstrleri qatysatyn bolady. Qazirgi ýaqytta bizde osyndaı naqtylanǵan málimet bar», dedi Syrtqy ister mınıstri Qaırat Ábdirahmanov.
Buǵan deıin elordada ótetin Shanhaı yntymaqtastyq uıymy sammıtine qatysý úshin Aýǵanstan Prezıdenti Ashraf Ganı Ahmadzaı, Mońǵolııa Prezıdenti Sahıagıın Elbegdorj, QHR Tóraǵasy Sı Szınpın, О́zbekstan Prezıdenti Shavkat Mırzıeev, Pákistan Prezıdenti Mamnýn Hýseın, Reseı Prezıdenti Vladımır Pýtınniń kelgenin habarlaǵan bolatynbyz.
ShYU sammıti barysynda Pákistan men Úndistan atalǵan uıymǵa múshelikke qabyldanady dep kútilýde. Osylaısha, ShYU jer turǵyndarynyń 40 paıyzyn, álem ekonomıkasynyń shamamen úshten birin qamtıtyn bolady. Búginde uıymǵa Reseı, Qytaı, Qazaqstan, Qyrǵyzstan, Tájikstan jáne О́zbekstan elderi múshe. Qazirgi ýaqytta ShYU tóraǵasy - Qazaqstan. Erteńgi sammıt barysynda tóraǵalyq Qytaı tarapyna ótedi.
