Almaty kúnderi án-kúımen órilmek
EKSPO aıasyndaǵy kópshilik basqosýlardyń biri – Almatynyń mádenı kúnderi. 11-19 maýsym aralyǵynda ótetin jıynda 400-den astam estrada juldyzy, qolónershi, shyǵarmashylyq ókilderi sheteldik qonaqtarǵa ónerlerin pash etedi. «Qazaqstan» ortalyq konsert zalynda uıymdastyrylatyn «Mahabbatpen, Almatydan!» atty alǵashqy konserttik baǵdarlamaǵa estrada juldyzdary Roza Rymbaeva, Qaırat Nurtas, Marjan Arapbaeva, Mádına Sádýaqasova, «Dos-Muqasan», «Jigitter» toptary, «Saryn» dýeti, «Saltanat» ansambli jáne basqalar óner kórsetpek. 12-16 maýsym aralyǵynda Almaty memlekettik qýyrshaq teatry Q.Qýanyshbaev atyndaǵy mýzykalyq-drama teatrynda kúnine eki ret «Qulynshaq pen Bóltirik», «Veselye medvejata» atty úzdik spektaklderin qazaq jáne orys tilderinde usynady. 16-17 maýsym aralyǵynda «Alataý» dástúrli óner teatry ujymynyń «Jastar» teatrynda «Asqaqtaı ber, qazaqtyń sazdy áýeni» atty mýzykalyq keshi ótedi.
Kópshilik apta boıy «Etnoaýyl Almaty» kórmesin tamashalaıdy. Munda úzdik sýretshiler men qolónershiler óz týyndylaryn qoıyp, sheberlik sabaqtaryna shaqyrady. 17 maýsymda kórme qonaqtary «Sazgen sazy» folklorlyq-etnografııalyq ansambliniń konsertin kórse, kelesi kúni kórmeniń amfıteatrynda mádenı kúnderdiń «Asqar taýly Almaty!» atty qorytyndy konserti ótedi. Oǵan ulttyq án-kúı óneriniń tarlandary Asylbek Eńsepov, Erbolat Shaldybekov, Ramazan Stamǵazıev, Edil Qusaıynov, Sholpan Darjanova, Sáýle Jumabaı, «Ulytaý», «Art Dala», «Alashuly» toptary, «Jetigen», «Sazgen sazy», «Saltanat» ansamblderi jáne basqalar qatysady dep kútilýde.
Jelaıaq Ekibastuzǵa jetti
Mamyr aıynyń sońynda shyǵysqazaqstandyq Ǵalymjan Toqtar EKSPO-2017 halyqaralyq kórmesine qatysý úshin Astanaǵa deıin júgirýge bel baılaǵan bolatyn. Ol óziniń bul áreketi arqyly elimizge jáne kórmege qoldaý kórsetetinin jetkizgen. О́skemendegi Qabanbaı batyr eskertkishinen bastap júgirgen marafonshy kúni keshe Ekibastuzǵa aıaldap, turǵyndardy qalanyń 60 jyldyq mereıtoıymen quttyqtady.
«Marafonshymen Ekibastuz qalasynyń shetindegi stellada kezdesip, suhbattastyq. Onda túski saǵat 12 kezinde kelgen ol shamamen 10-15 mınýttaı aıaldap, Pavlodar – Astana avtojolymen ári qaraı ketti. Júgirisin 10 maýsym kúni Astanada aıaqtaıdy. Sonda barlyǵy 1000 shaqyrym joldy jaıaý baǵyndyrmaq», deıdi Ekibastuz qalalyq dene shynyqtyrý jáne sport bóliminiń bas mamany Talǵat Sáken.
Ǵalymjan Toqtar О́skemen qalasyndaǵy halyqqa qyzmet kórsetý ortalyǵynda ınspektor bolyp jumys isteıdi. EKSPO-2017 kórmesiniń qurmetine Astanaǵa deıin jaıaý júgirip barý úshin 26 mamyr kúni jolǵa shyqqan ol kúnine 10 saǵat júgirip, shamamen 60-70 shaqyrym joldy artqa tastaıdy. Aýa raıy qolaıly bolsa, 80 shaqyrymǵa deıin jetkizetinin aıtqan. Al sportshynyń jary Erkegúl Muqııat kólikpen ilesip, barlyq jol barysyn beınetaspaǵa túsirýde.
Erikti qarııa EKSPO-ǵa qyzmet etedi
Kórmege qatysty taǵy bir qyzyqty jańalyq: Astana qalasy ákimdigi jastar saıasaty máseleleri basqarmasynyń basshysy Ashat Oralov eriktiler arasynda qarttar da bar ekenin aıtty. «Eriktilerdiń júzge jýyǵy eresekter men zeınetkerler. Arnaıy forma alǵan olar jumysqa saqadaı-saı. Eń úlken eriktiniń jasy jetpisten asqan, zeınetker. Eń jasy on beste, ol Nazarbaev zııatkerlik mektebinde oqıdy. 18 jasqa deıingi barlyq eriktilerdi tek ata-analarynyń ruqsatymen ǵana qabyldadyq», deıdi ákimdik ókili.
A.Oralov eriktiler quramynyń ulttary da ártúrli ekenin jetkizdi. Olardyń qatarynda tek astanalyqtar ǵana emes, sheteldik stýdentter de bar eken. Máselen, Qytaıda bilim alyp jatqan, qytaı jáne aǵylshyn tilderin erkin meńgergen 24 stýdent shilde aıynda keledi jáne tamyz aıynda olarǵa taǵy 59 adam qosylady. Sonymen birge, Mılandaǵy EKSPO-da erikti bolǵan 12 ıtalııalyq azamat ótinim bergen. Olar maýsym aıynyń sońynda kelmek.
Eń belsendileri oqý granttaryn ıelenedi
Jalpy, kórme jumysyna erikti bolýǵa úsh myńnan astam astanalyq stýdent ótinish bildirgen. Olardyń arasynan keminde úsh til biletin 1500 erikti iriktelgen. Aıta keterligi, EKSPO-2017 kórmesinde 6 myńnan astam erikti jumys istese, 4500-i kórme aýmaǵynda, 1500-i áýejaı, temir jol vokzaly, jedel mamandandyrylǵan qyzmetter, mádenı nysandar, qonaqúıler syndy qalanyń mańyzdy nysandarynda qyzmet etedi. Al qala ákimdigi EKSPO kórmesinde belsendilik tanytqan 20 stýdentke bir jyldyq oqý grantyn bólmek. Jastar saıasaty máseleleri basqarmasynyń basshysy Ashat Oralovtyń málimetinshe, jeńimpazdardy sýpervaızerler (eriktilerdiń úılestirýshileri) anyqtaıdy. «Odan bólek, olar alǵys hattar, syılyqtar men júldeler alady. Sondaı-aq, eriktilerdiń arnaıy formasy ázirlendi, onda úsh jeıde, beısbolka, kúrte, rıýkzak jáne termos bar», deıdi ol.
Taǵy aıta keterligi, eriktilerdiń barlyǵy «Nıka» oqytý ortalyǵynda arnaıy daıyndyqtan ótip, tálim alǵan. Onda qala tarıhy, Astananyń kórikti oryndary, EKSPO tarıhyn oqyp, sheteldik qonaqtarmen kelissózder júrgizýdiń qyr-syryn meńgerdi. Oqytý aıaqtalǵan soń barsha eriktige sertıfıkattar tapsyrylypty.
Eriktilerdiń jemisti jumys isteýi úshin qala ákimdigi barlyq qolaıly jaǵdaıdy jasady: bir aýysymda 500 erikti qalaǵa shyǵady, olar L.N.Gýmılev atyndaǵy Eýrazııa ulttyq ýnıversıtetiniń stýdentter úıine tegin ornalastyrylady jáne barlyǵy ystyq tamaqpen, tegin avtobýs bıletterimen qamtamasyz etiledi. Sonymen qatar, bos ýaqyttarynda qalada ótetin negizgi konsertter men is-sharalarǵa tegin kire alady jáne eriktiler úshin otandyq juldyzdarmen beıresmı kezdesý, mýzykalyq keshter uıymdastyrylady.
Ashat RAIQUL,
«Egemen Qazaqstan»
