Tórtkúl dúnıe kóz tigip otyrǵan halyqaralyq EKSPO kórmesiniń oıdaǵydaı ótýine elimizdiń ózge óńirlerimen birge oblys jurtshylyǵy da «bizderde mynadaı bar, mynadaı bar» degendeı, ónerpazdaryn baptap, ónimderin saqtap, tas-túıin ázir otyr. Oblystyq mádenıet, arhıv jáne qujattama basqarmasynyń bergen málimetterine súıensek, Shyǵys Qazaqstan EKSPO kórmesi aıasynda 22 aýqymdy mádenı-buqaralyq is-shara ótkizedi. О́ńirdiń eń basty mádenı-tanymdyq sharalary elordanyń irgesindegi «Qazanat» atshabaryndaǵy «Etnoaýyl» kesheninde ótedi dep josparlanǵan. 21 shilde men 31 shilde aralyǵynda Shyǵys Qazaqstan oblysy ulttyq úlgide bezendirilgen 5 kıiz úıde Jambyl oblysymen birlese otyryp «Shyǵys bazary» atty qolónershiler kórmesin uıymdastyratyn bolady. 23 shilde kúni dál osy jerde shuǵylaly shyǵystyń ónerpazdary án men jyrdan shashý shashpaq. Osy kúni EKSPO qonaqtary Tarbaǵataı aýdanynyń týmasy, áýlıe Yrǵyzbaı Dosqanauly kesenesiniń shyraqshysy Bolat Taǵabaıdyń 100 myń asyqtan quralǵan úlken asyǵyn tamashalaıdy. Bul, ásirese, shet elden kelgen týrısterdiń tańdaıyn qaqtyrary anyq. Ulttyq ónerdiń janashyry bul asyqtardy 16 jyl boıy jınaǵanyn aıtady. «Asyq sany 25 myńǵa jýyqtaǵanda Gınnestiń rekordtar kitabyna tirkelý úshin ótinish jazdym. Eki aıdan keıin «Asyqtyń sany jóninen álemde sizdiń aldyńyzǵa túsetin adam joq. Rekordtar kitabyna engizýge bolady» degen jaýap keldi. Gınnestiń rekordtar kitabynyń Astanadaǵy fılıaly meni shaqyryp, asyqtardyń engeni týraly sertıfıkatty tabys etti. Asyqty jınaý bar da, ony saqtaý bar. Durys saqtamasań shirip ketedi. Shirimes úshin qazandaǵy qaınaǵan sýǵa salyp, qara tuz qosyp, 3-5 saǵat qaınatamyz. Tuz asyqtyń maıyn soryp alady», – deıdi Bolat Taǵabaı. Sonymen qatar bul kúni Shyǵys Qazaqstannyń 28 qolóner sheberiniń teriden, tastan, qyshtan, aǵashtan, ózge de materıaldardan jasalǵan buıymdary jurtshylyq nazaryna usynylmaq. Oblysymyzdyń halyqaralyq kórme aıasyndaǵy mádenı kúnderi 25 shildede saǵat 18:00-de «Amfıteatr» aýmaǵynda ótetin «Aq ertis» atty gala-konsertpen túıindelmek.
Eki aıǵa sozylatyn kórme kezinde Astanada elimizdiń óńirleriniń aýylsharýashylyq ónimderiniń jármeńkesi ótedi. Shyǵys Qazaqstannyń jármeńkesi Jambyl jáne Pavlodar oblystarymen birge 1-2 shilde kúnderi elordadaǵy «Qazaqstan» sport kesheniniń aýmaǵynda uıymdastyrylady dep josparlanǵan. Jármeńkede 50 tonna jylqy, 40 tonna qus eti, 30 tonna sút ónimderi, 40 tonna bal, 35 tonna kúnbaǵys maıy, 30 tonna balyq, 10 tonna qymyz ben 7 tonna ulttyq taǵamdar, jalpy kólemi 300 tonnaǵa jýyq ónim saýdaǵa shyǵarylmaq.
EKSPO kórmesinde el nazaryn aýdarýǵa tıis erekshe eksponattardyń biri «Tokomak» termoıadrolyq materıaltaný reaktorynyń Kýrchatov qalasynda ornalasqan Ulttyq ıadrolyq ortalyq mamandarynyń qolymen jasalǵanyn aıta ketýdiń sáti kelip turǵan sekildi. Elimizdi qoıyp, dúnıe júzi ǵalymdarynyń qyzyǵýshylyǵyn týdyryp otyrǵan qurylǵy kórme qarsańynda, ıaǵnı 9 maýsymda Elbasynyń qatysýymen iske qosylady dep kútilip otyr. Ulttyq ıadrolyq ortalyqtyń bas dırektory Erlen Batyrbekov ǵalymdar reaktordy jasaý úshin 14 jyl boıy ter tókkenin aıtady. «Bul qondyrǵyny jerdegi jasandy kún kózi desek te bolady. Bul – energııanyń taýsylmas kózi. Ishinde qyzdyrylǵan plazmasy bar magnıtti katýshkalar ornatylǵan troıdaldy kamera. Onyń temperatýrasy birneshe mıllıon gradýsqa deıin jetedi», deıdi ortalyq dırektory.
Azamat QASYM,
«Egemen Qazaqstan»
Shyǵys Qazaqstan oblysy
