Senat Tóraǵasy sıngapýrlyq parlamentshilerge memleketter basshylary N.Nazarbaev pen Lı Kýan Iý negizin qalaǵan ekijaqty yntymaqtastyqtyń qarqyndy damyp kele jatqanyn atap ótti.
Qazaqstan Parlamenti joǵarǵy palatasynyń basshysy Sıngapýrdyń EKSPO-2017 halyqaralyq kórmesine belsendi qatysýyn joǵary baǵalady jáne osy eldiń energııanyń balama kózderin paıdalanýdaǵy jetistikterin atap ótti.
Áńgime barysynda saýda-ekonomıkalyq, ınvestısııalyq yntymaqtastyq jáne jańa tehnologııalar men ınnovasııa salasyndaǵy ózara ekijaqty baılanysty keńeıtý máseleleri talqylandy. Senat Tóraǵasy birlesken jobalardy iske asyrý úshin EKSPO negizinde ashylatyn Jasyl tehnologııalar men «Astana» halyqaralyq qarjy ortalyqtaryn paıdalanýǵa bolady dep sanaıdy.
Q. Toqaev sıngapýrlyq ınvestorlar úshin Qazaqstan naryǵy áleýetiniń tartymdylyǵy arta túskenine nazar aýdardy. Astana Sıngapýr men Eýrazııalyq ekonomıkalyq odaq arasyndaǵy erkin saýda týraly kelisimin bekitý jónindegi kelissózderdi qoldap keledi.
Senat Tóraǵasy «Nurly jol – bolashaqqa bastar jol» baǵdarlamasy men Qytaıdyń «Bir beldeý, bir jol» bastamasynyń aıasynda ınfraqurylymdyq jáne kólik jobalaryn iske asyrýǵa baılanysty aýqymdy múmkindikterdi atap ótti. «Qazaqstan EAEO, Ortalyq Azııa jáne Eýropa elderiniń naryqtary jolynda taýar men qyzmet kórsetýge aımaqtyq logıstıkalyq torapqa aınalýy tıis», dedi ol.
Sonymen birge, Q.Toqaev Qazaqstannyń taǵatty saıasaty týraly da áńgimeledi jáne Prezıdent Nursultan Nazarbaevtyń Álemdik jáne dástúrli dinder lıderleriniń sezin shaqyrý jónindegi bastamasyna jan-jaqty toqtaldy.
Halıma Iаkob óz kezeginde júzge jýyq qazaqstandyq kompanııalar Sıngapýrǵa ınvestısııa ákelgenin, bul qadam aýqymdy ınfraqurylymdyq jobalardy iske asyrýǵa baılanysty osy eldiń kompanııalaryna jol ashatynyn aıtty. Sıngapýr Parlamenti Tóraıymynyń aıtýynsha, qarjy sektory men konsaltıng qyzmetin kórsetý salalary óz otandastaryna basymdyqqa ıe bolý múmkindigi bar.
H.Iаkob jyly shyraıly qabyldaýǵa rızashylyq bildirdi jáne Q.Toqaevty EKSPO-2017 halyqaralyq kórmesindegi Sıngapýrdyń ulttyq pavılonynyń ashylýy saltanatyna qatysýǵa shaqyrdy.
