OSK saılaý prosesin uıymdastyrý jáne OSK músheleriniń qyzmetin qamtamasyz etý bóliminiń meńgerýshisi Maqsathan Anapınniń baıandaýynsha, oblystyq, Astana jáne Almaty qalalyq saılaý komıssııalary Qazaqstan Respýblıkasy Parlamenti Senaty depýtattarynyń 16 mandatyna usynylǵan 89 úmitkerdiń ishinen 52 kandıdatty tirkedi. Tirkelgen kandıdattardyń ishinde 47 er adam jáne 5 áıel adam bar. Kásip toby boıynsha 4-eýi Parlament Senatynyń qazirgi depýtattary, 3-eýi máslıhattardyń depýtattary, 15-i memlekettik uıymdardyń, kásiporyndardyń jáne mekemelerdiń qyzmetkerleri, 11-i memlekettik qyzmetshiler, 16-sy kommersııalyq qurylymdardyń qyzmetkerleri bolyp keledi.
Mamandyǵyna kelsek, dáriger – 3, ınjener – 16, zańger − 6, saıasattanýshy – 1, oqytýshy – 8, ekonomıst − 11, aýyl sharýashylyǵy qyzmetkeri − 7 , basqa mamandyq ıeleri − 2 adam. «Tirkeý barysynda jeke ótinishi boıynsha 17 kandıdat, kiristeri men múlki týraly usynylǵan málimetterdiń sáıkes emestigi boıynsha 13 kandıdat alynyp tastaldy, 7 úmitkerge qajetti qujattardy usynbaýyna baılanysty tirkeýden bas tartyldy, − dedi ol. − Kandıdattardyń ortasha jasy − 51,5 jas». Baıandamashynyń atap ótýinshe, tirkelgen kandıdattar tiziminde qazirgi senatorlar − N.Qylyshbaev, J.Nurǵalıev, M.Baqtııaruly, B.Shelpekov bar. Sondaı-aq, kandıdattar qataryna Parlament Májilisiniń eks-depýtaty D.Nóketaeva men grek-rım kúresiniń has sheberi Shámil Serikovtiń uly Tımýr Serikov te kirip otyr.
Sonymen qatar, otyrysta «2017 jylǵy 28 maýsymǵa taǵaıyndalǵan Qazaqstan Respýblıkasy Parlamenti Senatynyń depýtattaryn saılaýǵa saılaý bıýlletenderin daıyndaý týraly» qaýly qabyldandy. Qaýlyǵa sáıkes oblystyq, Astana jáne Almaty qalalyq saılaý komıssııalaryna tıisti ákimshilik-aýmaqtyq birlik tańdaýshylarynyń sanyna sáıkes saılaý bıýlletenderin daıyndaý tapsyryldy. Budan bólek, otyrysta «2017 jylǵy 28 maýsymǵa taǵaıyndalǵan Parlament Senatynyń depýtattaryn saılaýdy ótkizý kezinde Ortalyq saılaý komıssııasy Internet-resýrsynyń fýnksıonalyn paıdalaný reglamentin bekitý týraly» qaýly da qabyldandy.
Bul joba saılaý júıesin sıfrlandyrý sheńberinde elektorattyq prosesterdi baıqaýdyń neǵurlym keń múmkindikterin berý úshin ázirlengen. Elektrondy tirkeý tańdaýshylardyń kelýi týraly, sondaı-aq óńirlerde daýystardy sanaý rásimi aıaqtalǵan soń daýys berýdiń aldyn ala qorytyndylary týraly aqparatty Ortsaılaýkomnyń resmı saıtynda onlaın rejimde ornalastyrýǵa múmkindik beredi. OSK múshesi Konstantın Petrovtyń baıandaýynsha, qazirgi ýaqytta Ortsaılaýkom tańdaýshylardy elektrondy tirkeýdiń qanatqaqty jobasyn tehnıkalyq qamtamasyz etý jónindegi jumystardy bastady. Ázirlengen fýnksıonaldy testileý synaqtary kelesi aptaǵa josparlanyp otyr. Búginge deıin Ortsaılaýkomǵa kandıdattardan eki ótinish kelip tústi, olarǵa saılaý zańnamasynyń normalaryn túsindire otyryp, jaýaptar berildi.
«2017 jylǵy 8 maýsymnan Senat depýtattyǵyna tirkelgen kandıdattardyń barlyǵy 2017 jylǵy 27 maýsym kúngi saǵat 24.00-ge deıin sozylatyn saılaý aldyndaǵy úgitke kirisý múmkindigine ıe, − dedi K.Petrov. − Barlyq kandıdattarǵa úgit jumysyn júrgizý úshin birdeı jaǵdaılarǵa kepildik berilgen. Úgit naýqany barysynda saılaý zańnamasy normalarynyń saqtalýyn baqylaýdy qamtamasyz etý maqsatynda Ortsaılaýkom, oblystyq, Astana jáne Almaty qalalyq saılaý komıssııalary BAQ monıtorıngin júzege asyratyn bolady».
Keńeıtilgen otyrystyń jumysyna oblystyq, Astana jáne Almaty qalalyq saılaý komıssııalarynyń tóraǵalary men hatshylary jáne Astana qalasy máslıhatynyń depýtattary qatysty.
