«Respýblıkadaǵy kásipodaqtardyń mindeti – jumysshylardyń quqyqtaryn túsindirý jáne qorǵaý. Bizdiń federasııa eldiń túkpir-túkpirinde byltyr qabyldanǵan jańa «Eńbek kodeksi» men 2014 jyly qabyldanǵan ózimizdiń «Kásipodaqtar týraly» Zańdy túsindirý jumystaryn júrgizýde», – dedi Qazaqstan Respýblıkasy Kásipodaqtar federasııasynyń tóraǵasy Ábilǵazy Qusaıynov.
«Memleket basshysynyń «Bolashaqqa baǵdar: rýhanı jańǵyrý» atty baǵdarlamalyq maqalasynyń negizgi mindettemelerin júzege asyrý áleýmettik jańartýdyń kepili», – dedi kásipodaq qozǵalysynyń ókilderi.
Sonymen qatar, Federasııa tóraǵasy mekemelerdiń qaramaǵyndaǵy qyzmetkerler quqyǵyn buzý máselesi týraly da pikirimen bólisti. «Qazirgi ýaqytta jumys berýshilerdiń tarapynan jumyskerler quqyqtarynyń buzylý derekteri azaıyp keledi. О́ıtkeni, daýlasqan taraptar máseleni zańǵa júgine otyryp sheshetin bolǵan. Degenmen, biz de bosańsymaı, jumyskerler quqyqtaryn qorǵaý men onyń buzylýynyń aldyn alý sharalaryn turaqty ótkizip turamyz. Máselen, 2017 jyldyń alǵashqy toqsanynyń ózinde biz respýblıka boıynsha 2 myńdaı azamatty qabyldadyq. Olardyń bizge aryzdanyp kelgende aıtatyn máseleleri negizinen jumysqa ornalasý, negizsiz jumystan qýylý jáne jalaqynyń ýaqtyly tólenbeýi. Kásipodaqtar bul máselelerdiń bárin sheshýge tıisti memlekettik organdardy tartyp, eshbir azamattyń aryzyn bos qaıtarmaýǵa tyrysady», – dedi Ábilǵazy Qusaıynov.
Aıta keteıik, Qazaqstanda jumysshylar quqyqtarynyń buzylý derekteriniń basym kópshiligi jalaqynyń ýaqtyly tólenbeýi ekeni anyq. Bul, ásirese, jekemenshik sektorǵa qatysty. Osy oraıda, Kásipodaqtar federasııasynyń tóraǵasy mundaı máseleler Eńbek jáne halyqty áleýmettik qorǵaý mınıstrligimen jáne Bas prokýratýramen birlesip sheshiletinin aıtty.
Baýyrjan MUQANOV,
«Egemen Qazaqstan»
