– Aleksandr myrza, álem chempıonatyna irikteý aıasyndaǵy erteńgi Danııaǵa qarsy oıynǵa daıyndyqtaryńyz qandaı?
– Shákirtterim 10 maýsymdaǵy oıynǵa 100 paıyz daıyn bolý úshin tynbaı jattyǵý jasaýda. Talǵarda ornalasqan bazamyz fýtbolshylarǵa óte qolaıly. Jýyrda fýtbolshylar daıyndalatyn ortalyqty zaman talabyna saı jóndep, paıdalanýǵa berdi. Buıyrsa, óz jerimizde, jankúıerlerimizdiń aldynda jaqsy oıyn kórsetemiz dep oılaımyn. Ulttyq qurama fýtbolshylarymen qatar, Talǵarda jastar quramasy da daıyndalýda. Bir sózben aıtqanda, kezdesýge tas-túıin daıynbyz.
– Byltyr Kopengagende ótken Qazaqstan-Danııa arasyndaǵy alǵashqy kezdesýdi kórgen bolarsyz. Sizdińshe, sol oıynda Qazaqstan quramasyna ne jetispedi?
– Naqty myna nárse jetispedi dep tap basyp aıta almaımyn. Kez kelgen jeńilisten soń oń qorytyndy jasaý kerek. Biz kóbirek jumys istep, alǵa qaraı jyljýymyz qajet. Sonda ǵana jaqsy nátıjege jetýge bolady.
– Danııa quramasynyń qazirgi múmkindigin qalaı baǵalaısyz? Qaı fýtbolshylary bizge qıyndyq týǵyzýy múmkin?
– Danııa quramasy − eýropalyq deńgeıdegi úzdik quramanyń biri. Fýtbolshylarynyń kóbi Eýropanyń TOP-5 chempıonatynda oınaıdy. Bul – Danııa quramasynyń halyqaralyq deńgeıde tájirıbesi bar degen sóz. Mysaly, aǵylshyn premer-lıgasyndaǵy «Tottenhemniń» jartylaı qorǵaýshysy Krıstıan Erıksendi, Býndeslıgadaǵy Menhengladbahtyń, «Borýssııa» klýbynda dop tebetin qorǵaýshylar Andreas Krıstensen men Iаnnık Vestergordy, «Aıaks» komandasynyń jas shabýylshysy, jýyrda ǵana Eýropa lıgasynyń fınalynda oınaǵan Kasper Dolberg jáne taǵy basqa tájirıbeli oıynshylardy atap ótýge bolady.
– 10 maýsym kúni Qazaqstan Ulttyq quramasy qandaı jaǵdaıda sátti oıyn kórsetýi múmkin?
– Biz óz úıimizde ıaǵnı, Almatyda jankúıerlerimizdiń aldynda oınaımyz. Bul fýtbolshylar úshin óte mańyzdy. Stadıon toly jankúıer aldynda shákirtterim aıanyp qalmaıdy dep úmittenemin. Ár fýtbolshy óziniń jaqsy oıyn órnegin kórsetip, tek jeńis úshin alańǵa shyǵady.
– Danııaǵa qarsy matchqa daıyndyq barysynda jastar quramasymen kezdesý ótkizipsizder...
– Jetinshi maýsym kúni elimizdiń jastar quramasymen baqylaý oıyn ótkizip, 4:2 esebimen jeńiske jettik. Oıyn jabyq túrde boldy. Sondyqtan jýrnalısterdi shaqyrmadyq. Bul kezdesý biraz qatelikterimizdi kórsetip berdi. Danııaǵa qarsy oıynda qatelikterdi túzeıtin bolamyz. Bul oıyn árbir jas fýtbolshynyń keleshekte ulttyq qurama sapynda oınaýǵa umtylý maqsatynda josparlanǵan. Aıta keterligi, bizde jastar quramasynyń jattyqtyrýshylar shtabymen ózara túsinistik jaqsy qalyptasqan.
– Jas fýtbolshylardyń oıynyn qalaı baǵalaısyz?
– Árıne, olar bizdiń bolashaqtaǵy úmitimiz. Jastardyń qazirden ulttyq quramanyń negizgi fýtbolshylarymen birge jattyǵýy olardy yntalandyryp, qosymsha kúsh beredi. Tek eńbek etip, tynbaı jattyǵyp, óz-ózin damytatyn bolsa, bolashaqta jastardan kóp úmit kútemin.
Áńgimelesken
Álı BITО́RE,
«Egemen Qazaqstan»
