Saıası qýǵyn-súrgin qurbandarynyń rýhyna arnalǵan kartına bas-aıaǵy 10 kún ishinde túsirilgen. Fılm ssenarıin jazǵan belgili jýrnalıst, «Jetisý» telearnasy dırektorynyń orynbasary Serik Ábikenulynyń aıtýynsha, fılmdi jergilikti azamattardyń qoldaýymen túsirip shyqqan.
– Osy bir shaǵyn áńgimede qazaq qasireti túgel kórinis tapqan. Almajannyń qolyndaǵy bir ýys bıdaı – qazaqtyń ómirdi ýystaýy. Maǵan erekshe áser etkeni osy. Qazaqtyń ómirge degen talpynysy men ómirdi ýysynan shyǵaryp almasa eken degen úmitpen bolashaq urpaqqa osy áńgimeniń jelisimen túsirilgen fılmdi usynyp otyrmyz. El aýyzynda aıtylyp júrgen biraz oqıǵalardy qosyp, kórermenge áser etetindeı kompozısııalyq mazmunyn baıyttyq, – degen rejısser Serik Ábikenuly zulmat jyldar zardaby týraly nasıhat memlekettik deńgeıde qolǵa alynýy tıis ekendigin aıtady.
Fılmde rejısserdiń oıpańda ornalasqan aýyldyń jutaǵan, ashtyq jalmaǵan ómirin kórsetýinen, jalpy qııan-keski arpalysqa toly qazaq taǵdyryn tanımyz. Jyrtyq kımeshegimen júreleı otyryp tań atqaly sabandy aqtaryp, kún tas tóbege kóterilgenshe Almajannyń bar jınaǵany ýysqa tolatyn bıdaı. Qyrman basynda búksheńdep júrgen áıeldi kórgen sholaq belsendiler «qoǵam múlkine qastandyq jasadyń» dep tepki astyna alady. Zińgitteı jigitterdiń jabylyp júrip bir ýys bıdaı jumylǵan alaqandy asha almaýy fılmdegi de, áńgimedegi de eń bir áserli tusy. Fılm sońynda Saltaq-Almajan eski qyrmanda shirigen saban arasynan bir-birlep terip, kúnuzaq jınaǵan bir ýys bıdaıyn ózimen birge o dúnıege ala ketti, ol jaqta da tirshilik bolsa, balalaryna bylamyq kóje pisirip beredi dep túıindeledi.
Fılm Almaty oblysynyń Qaratal aýdany mańynda túsirilgen. Kartınaǵa kerek kıiz úı men eski jádigerlerdi M.Tynyshpaev atyndaǵy ólketaný murajaıy usynǵan. Fılm rejısserleri Serik Ábikenuly, Danııar Mustafaev, qoıýshy-operatory Aıdos Qalıev. Fılmge Almaty oblystyq B.Rımova atyndaǵy drama teatrdyń jáne Ǵ.Músirepov atyndaǵy balalar jáne jasóspirimder teatrynyń akterlary qatysqan.
– Fılmdi túsirýge Úshtóbe qalasynyń ákimdigi men jergilikti azamattar qol ushyn sozdy. Eshkim bizden bir tıyn aqsha suraǵan joq, kerisinshe qulshyna kómektesti. Uıymdastyrý jumysyna atsalysqan Máýlen Nesipbek, Dosan Qyzaıbaıulyna, kartına dırektory Gúljan Qyzaıbaıǵa alǵys aıtamyn, – degen Serik Ábikenuly aldaǵy josparymen bólisti. Jýrnalıstiń aıtýynsha, endi shyǵarmashylyq ujym Jetisý ólkesindegi «Kisi qyrylǵan», «Adam ólgen», «Borshabulaq qyrǵyny» dep atalǵan tarıhı oryndar týraly derekti fılmder sıklin túsirýge daıyndalyp jatqan kórinedi.
Aıa О́MIRTAI,
«Egemen Qazaqstan»
