Oblystyq ákimdik janyndaǵy memlekettik qyzmetshilerdi qaıta daıarlaý jáne biliktilikti arttyrý aımaqtyq ortalyǵynyń dırektory Sabyr Ibraev kýrstardan ótken memlekettik qyzmetshiler mindetti túrde sybaılas jemqorlyq zańnamasyna qatysty test tapsyratynyn, jyl basynan osyndaı synaqtan 266 tyńdaýshy ótkenin, olardyń 51-i «úzdik», 77-si «jaqsy», 131-i «qanaǵattanarlyq», al 7-eýi «qanaǵattanǵysyz» nátıje kórsetkenin tizbelegenimen, oblys ákimi Qumar Aqsaqalov memleket qarjysy jumsalatyn kýrstar kóbine dáris oqý úshin ǵana jumys isteıtinin, qyzmet sapasyn jaqsartý sharalary kóńil kónshitpeıtinin atap kórsetti.
«Oqýǵa, biliktiligin jetildirýge jiberilgen mamandar qyzmetine oralǵan kezde tyń oımen, jańashyldyq ıdeıamen erekshelenýi tıis. О́kinishtisi sol, mundaı ózgerister baıqalmaıdy. Memlekettik basqarý akademııasyn bitirip kelgen 19 tyńdaýshynyń jartysynyń ǵana qyzmeti ósken. Beseýi jumyssyzdar qatarynda. Kýrstar, oqýlar nátıje bermeıtin bolsa, onda memleket qarjysy qaıtarylýy kerek», dedi Qumar Irgebaıuly.
Qaǵazdaǵy esep úshin memlekettik qyzmetshilerdi oqytýdyń qajeti joq ekenin basa aıtty.
Sybaılas jemqorlyqqa qarsy is-qımyl jónindegi Ulttyq bıýronyń óńir boıynsha departamentiniń basshysy Nyǵmetjan Saparov memlekettik qyzmetshiler jumys ýaqytynda ǵana emes, odan tys kezde de ózderin durys ustaýlary tıistigin jetkizdi. Ádep normasyn saqtamaıtyndar az kezdespeıdi.
Osy rette Q. Aqsaqalov barlyq memlekettik organdardyń saıttaryn jańartyp turýǵa basa kóńil bólý qajettigin jınalǵandardyń esine saldy.
«Aýdan ákimderiniń saıttaryn qarasań, bıýdjet qarajatynyń qaıda jumsalyp jatqandyǵy, memlekettik satyp alýlar týraly aqparat joq. Bir aýdanda, tipti aqparat 2015 jyldan beri jańartylmaǵan. Memlekettik organdar jumysyna turǵyndardan túsetin shaǵymdar da azaıar emes», dedi ol.
О́mir Esqalı,
«Egemen Qazaqstan»
