Dál osy kúnderi Almatynyń ortalyq kóshelerinde alyp qýyrshaqtar júr. О́ıtkeni, álemniń ár túkpirindegi tanymal qýyrshaq teatrlary I Dúnıejúzilik qýyrshaq karnavalyna qatysý úshin Almatyǵa kelgen.
I Dúnıejúzilik qýyrshaq karnavalynyń Qazaqstanda ótýiniń de óz jóni bar. Eger oqyrmandarymyzdyń esinde bolsa, ótken jyly Almaty qalasyndaǵy memlekettik qýyrshaq teatrynyń «Qańbaq shal» atty qoıylymy Praga qalasynda ótken XIV Dúnıejúzilik qýyrshaq óneri festıvaliniń bas júldesin jeńip alǵan bolatyn. Osylaısha elimiz I Dúnıejúzilik qýyrshaqtar karnavalyn ótkizýge qol jetkizdi.
Almaty qalasyn qýyrshaq óneriniń ordasyna aınaldyrǵan aýqymdy mádenı sharany ótkizýge Almaty qalasynyń ákimdiginen bastap, memlekettik qýyrshaq teatry, Dúnıejúzilik qýyrshaqshylar assosıasııasy jáne «Tanaris» kınokompanııasy atsalysyp otyr.
Sonymen karnavalda Shveısarııa, Portýgalııa, Fransııa, Germanııa, Iran, Chılı, Norvegııa, Reseı, Ispanııa, AQSh, Italııa, Rýmynııa, Ýkraına, Perý, Armenııa jáne t.b. elderden kelgen qýyrshaq teatrlary toǵysyp otyr.
Mundaı salmaqty shara kezdeısoq uıymdastyrylyp otyrǵan joq. «Almaty-2011 Dúnıejúzilik qýyrshaq karnavaly» el Táýelsizdiginiń 20 jyldyq mereıtoıyna arnalǵan.
Almaty kóshelerinde ketip bara jatqan alyp qýyrshaqtar, qyzyl-jasyldy kıingen ertegi keıipkerleri qala turǵyndaryn eleńdetip, balalardy elitti. О́z ártisterimiz sheteldik áriptesterimen birigip, kóshede halyqty balalyq shaqqa shaqyrdy. Al Kýba delegasııasynyń salso bıleri kópshiliktiń delebesin qozdyryp, karnavaldy qyzyqty ete tústi.
Sonymen «О́mir merekesi» uranymen ótkizilip jatqan bul shara kúzdiń salqyn kúnderine jylylyq syılap jatqan jaıy bar. Karnaval baǵdarlamasyna halyqaralyq qýyrshaq teatrlary festıvali, halyqaralyq qýyrshaq fılmderi festıvaliniń saltanatty sherýi, sondaı-aq balalar úıleri men qarttar úıleri jáne emdeý mekemeleri úshin qaıyrymdylyq sharalaryn uıymdastyrý engizilgen.
Eń mańyzdy oqıǵa 1 qazanda Qazaqstannyń Tuńǵysh Prezıdenti atyndaǵy saıabaqtan bastaý alady. Ol kúni saıabaq 21 elden kelgen qýyrshaqtardyń qatysýymen aspan astyndaǵy úlken sahna alańyna aınalady.
Bir aıta ketetin jáıt, 25 qyrkúıek pen 2 qazan aralyǵynda Almaty qalasy memlekettik qýyrshaq teatry ǵımaratynda jáne «Artıshok» teatrynda halyqaralyq qýyrshaq teatrlary festıvali ótýde. Onda balalarǵa da, eresekterge de arnalǵan qoıylymdar kórsetilse, T.Júrgenov atyndaǵy Qazaq ulttyq óner akademııasynyń kınozalynda halyqaralyq qýyrshaq fılmderi festıvali ótip jatyr.
Aınash ESALI.
Almaty.
