Elektr qýaty sónip qaldy, plıtka qulady, kórshi kóligin durys qoımady, emhanada dórekilik tanytty, qubyr jaryldy, tóbelestiń kýágeri boldyńyz ba? Endi astanalyqtarǵa ózderiniń turmystyq máselelerin sheshý úshin birneshe mekemelerge habarlasýdyń qajeti joq. Bar bolǵany, ahýal ortalyǵynyń 109 nómirin terse, jetkilikti.
Elordanyń dıspetcherlik ortalyǵy bir aı buryn jumysyn bastaǵan bolatyn. Osy ýaqyt aralyǵynda turǵyndar arasynda keń qoldanyla bastady. Ortalyq jumysynyń nátıjesi men qyzmettiń bolashaǵy týraly elorda ákimdiginiń medıa ortalyǵyna Astana qalasy ákiminiń orynbasary Andreı Lýkın aıtyp berdi.
- Búgingi tańda qaladaǵy ahýaldy jedel baqylaý úshin úsh myń beınekameralar ornatylǵan. Solar arqyly barlyq aqparat ortalyqqa túsedi. Jyl sońyna deıin kameralar sanyn on myńǵa deıin jetkizý josparlanǵan. Kameralar qalanyń barlyq buryshtaryn baqylaıdy. Operatordyń mindeti ahýaldy qadaǵalap otyrý, turǵyndardyń qońyraýlary men shaǵymdaryna jaýap berý. Bul rette suraqtardyń ártúrli bolatynyn aıta ketken jón. Bul – ınfraqurylym, TJ, túsindirý, aqparat berý taǵy da basqa maǵynada bolýy múmkin. Operatorlar táýlik boıy jumys isteıdi. Olardyń jumysy shtatan tys jaǵdaılardy anyqtaý, quqyq buzýshylyqty boldyrmaý, turǵyndarǵa kómektesý, - deıdi Andreı Lýkın.
Ahýal ortalyǵynda barlyq memlekettik organdardyń ókilderi bolady. Sondyqtan olar qyzmet jumysynyń barynsha tıimdi bolýyn qamtamasyz etedi.
- Memlekettik organ ókilderi ortalyqta turaqty jumys isteıdi. Olar densaýlyq saqtaý, bilim, TÚKSh, qurylys jáne basqa da sala mamandary. Mańyzdylyǵy sol, shtattan tys jaǵdaıǵa nemese ınfraqurylymǵa qatysty qandaı da bir aqparatty alǵan boıda barlyq málimet bizdiń ahýal ortalyǵyndaǵy jaýapty mamandarǵa jetkiziledi. Mysaly, densaýlyq saqtaý basqarmasynan bólim mamany bolady, ol habarlamany alǵan bette ornatylǵan telefon nemese rasııa baılanysymen vedomstvolyq baǵynyshty mekemelerge tapsyrma beredi. Emhanalarǵa aýrýhanalarǵa jedel járdem stansııalaryna t.b. Olar da tapsyrma alǵan sátten jyldam áreket etedi jáne belgilengen ýaqyt reglamentine saı máseleni joıady, - deıdi Lýkın.
Qala ákimi orynbasarynyń aıtýynsha, erejede atalǵan máselelerdi joıý merzimi de kórsetilgen. Qosymsha resýsrtar qajet bolǵan jaǵdaıda aryzdanýshyǵa habarlanady.
- Eger ashyq lıýk bolsa, bir saǵattyń ishinde qalpyna kelýi tıis. Al, eger basqa qurylys kompanııalarynyń aralasýy qajet bolmasa, aıtalyq, bir jerdiń plıtkasy túsip qalsa, jóndeýge eki saǵat ýaqyt beriledi. Keıde túrli tehnıkalyq sebepterge baılanysty úlgermeı jatamyz, mysaly, materıaldardy jetkizý ne bolmasa aýystyrý qajet bolsa, biz aryzdanýshyǵa máseleni aıtyp, túsindiremiz, - deıdi A.Lýkın.
Qala ákimi orynbasarynyń aıtýynsha, turǵyndar tarapynan ótinish-talaptardyń basym bóligi kommýnaldy máselelerge qatysty. Degenmen, túrli jaǵdaıdar bolady.
- OpenAir sharasy kezinde bizge balalaryn joǵaltyp alǵandary týraly qyryqqa jýyq habarlama tústi. Iаǵnı, konsertti tamashalaýǵa kelgen ata-analar balalaryna kóz qyryn salmaǵan. Olar bizdiń kómegimizge júgindi, biz sol jerde júrgen ishki ister organdary, quqyqtyq tártip, eriktiler, arnaıy qyzmettiń mamandary arqyly birden kómekke keldik. Sonyń arqasynda az ýaqyttyń ishinde balalardy taýyp, ata-analaryna tabystadyq, - dedi Lýkın.
Ortalyqtyń jumys istegenine bir aı ǵana bolǵanyna qaramastan úlken suranysqa ıe. Turǵyndardan bólek, sheteldikter de baǵa týraly nemese basqa da anyqtamalyq suraqtarǵa qatysty jıi habarlasady. Ortalyqtyń operatorlary alty tilde keńes bere alady. Táýlik ishinde ortasha eseppen 600-ge jýyq qońyraý kelip túsedi. Atalǵan qyzmet túrine aldaǵy ýaqytta suranys artýy múmkin.
- Qoldaǵy resýrstar operatorlar men telefon jelileriniń sanyn kóbeıtýge múmkindik beredi. Biz oǵan daıynbyz. Ortalyqtyń operatorlaryna barlyq turmystyq jaǵdaı jasalǵan: ashana, kıinetin bólme, áıelder men erlerge arnalǵan jatatyn, jýynatyn oryn. Munda júzden astam adam jumys istep jatyr. Qajet bolǵan jaǵdaıda olardyń shtattyq keste saı jumys isteýleri úshin taǵy da adamdardy jumysqa alatyn bolamyz, - dep túıindedi sózin A.Lýkın.
