Arnaıy delegasııa quramyn Jambyl oblysynyń ákimi Kárim Kókirekbaev oblys shekarasynan kútip aldy. Budan keıin Janseıit Túımebaev «Býrnoe Solar-1» kún elektr stansııasyna bardy. Negizgi qyzmet túri elektr energııasyn óndiretin seriktestik Jýaly aýdany, Nurlykent aýylynda ornalasqan. Jobalyq qýaty 50 MVt bolatyn mekeme elimizdegi eń iri elektr stansııasy bolyp sanalady. Arnaıy delegasııa Jýaly aýdanynan shyqqan soń atbasyn Jambyl aýdanyna buryp, Aısha bıbi kesenesine keldi. Aısha bıbi kesenesi Áýlıeata óńiriniń negizgi tarıhı nyshandarynyń biri. Bul oraıda Janseıit Qanseıituly bastaǵan top ortaǵasyrlyq tarıhı eskertkishti tamashalap, kópshilikpen pikirlesti. Sonymen qatar, ońtústikqazaqstandyq delegasııa «Qazaq handyǵyna 550 jyl» monýmentimen de tanysty. Munda Qazaq handyǵynyń týyn tikken Kereı men Jánibektiń beıneleri kórinis taýyp, eldiktiń beınesin tanytyp tur.
Olımpıada jetkinshekterin daıyndaıtyn «Atletık» oqý-jattyǵý kesheni 2011 jyly salynǵan. Munda kelýshiler úshin ámbebap zaly, aýyr atletıka, grek-rım kúres, kıkboksıng, taekvondo, armrestlıng jáne erkin kúres zaly jumys isteıdi. Atalǵan nysandy aralap kórgen delegattar «Taraz-Arena» sport kesheniniń de jumysymen tanysty. Budan keıin Janseıit Túımebaev «Qazfosfat» JShS mıneraldy tyńaıtqyshtar zaýytynda, «Kóne Taraz» mýzeıinde, «Qarahan» kesenesinde jáne Jambyl atyndaǵy «Rýhanııat» ortalyǵynda boldy. Áriptestikti damytý, tájirıbe almasý maqsatynda Áýlıeatada kezdesken eki oblystyń basshylary mundaı úrdis aldaǵy ýaqyttarda da jalǵasa beretinin aıtty.
Hamıt Esaman,
«Egemen Qazaqstan»
Jambyl oblysy
