Dál qazirgi kezde Medıa ortalyqtaǵy jýrnalısterge arnalǵan úlken bir zal lyq toly. Álemniń túkpir-túkpirinen jáne elimizdiń óńirlerinen kelgen buqaralyq aqparat quraldary ókilderiniń tym kóptiginen, akkredıtasııa men qatysýshylarǵa qyzmet kórsetý ortalyqtarynyń zaldary bosatylyp berilýde. Ár zaldaǵy arnaıy LED ekrandardan otandyq jáne sheteldik tilshiler álem kóz tikken EKSPO-2017 kórmesiniń ashylý saltanatyn tamashalap, jaza alady.
«Bizde mass-medıaǵa arnalǵan 500 oryn bar edi. Alaıda, kelgen jýrnalısterdiń sany myńnan asyp ketti. Qazir munda shamamen 1200 jýrnalıst otyr. Onyń 400-i ózimizdiń BAQ ókilderi bolsa, qalǵan 800-i – sheteldik tilshiler», deıdi «Astana EKSPO-2017» ulttyq kompanııasy Qoǵammen baılanys departamentiniń dırektory Sergeı Kýıanov.
Aldyn-ala málim bolǵandaı, 19:00-den keıin EKSPO aımaǵyna memleket pen úkimet basshylary keledi. Al ashylý saltanaty 20:17-ge belgilenip otyr. S.Kýıanovtyń aıtýynsha, tikeleı translıasııany barlyq qazaqstandyq arnalar alyp otyr. Al translıasııanyń tolyq nusqasyn «Habar» agenttigi men «Qazaqstan» ulttyq arnasy kórsetpek. Budan bólek, «Astana EXPO-2017» resmı saıty men «Youtbe» ǵalamtor arnasynan kórýge bolady. Sonymen qatar, tikeleı efırdi «CNN» men «BBC» arnalary da surap otyrǵan kórinedi.
Ashat RAIQUL,
«Egemen Qazaqstan»
Sýretti túsirgen
Erlan OMAROV,
«Egemen Qazaqstan»
