Memleket basshysy Cheh Respýblıkasynyń Prezıdentine «EKSPO-2017» halyqaralyq kórmesiniń ashylýyna qatysqany úshin rızashylyq bildirdi.
– Sizdiń 2014 jyly Qazaqstanǵa kelgen saparyńyz esimde. Sodan beri elderimiz arasynda kóp jumys atqaryldy, saıası jáne ekonomıkalyq salada ekijaqty qatynastardyń damýy oń qarqyn alyp otyr, – dedi Nursultan Nazarbaev.
Qazaqstan Prezıdenti M.Zemannyń memleket qaıratkeri retinde kún tártibindegi túrli halyqaralyq jáne óńirlik máseleler boıynsha óziniń jeke pikiri bar ekenin, ol árdaıym osy arqyly erekshelenetinin atap ótti.
Cheh Respýblıkasynyń Prezıdenti ózimen birge kásipkerler tobynyń kelgenin, olardyń ekonomıkalyq baılanystardy damytýǵa, Qazaqstan ekonomıkasynyń túrli salalaryna ınvestısııa salýǵa múddeli ekenin aıtty.
– Men Chehııa Úkimeti aldynda sóılegen sózimde «EKSPO-2017» halyqaralyq kórmesine qatysý qajettiligin aıtqan bolatynmyn, óıtkeni ony óte mańyzdy is-shara dep sanaımyn. Onyń ústine biz Qazaqstandy óńirdegi kóshbasshy retinde qarastyramyz,– dedi M.Zeman.
Sondaı-aq, Cheh Respýblıkasynyń Prezıdenti Astananyń ásem qala ekenin aıtyp, Nursultan Nazarbaevtyń bastamasymen salynǵan Qazaqstan astanasynyń kelbetinde kórinis tapqan arhıtektýralyq ıdeıalardy joǵary baǵalady.
