Saraı aldyna jınalǵandardyń sany 2 jarym myń adamnan asyp jyǵyldy. Abaı eskertkishin aınala qorshaǵan Almatylyqtar, Alataý baýraıynan esken salqyn samalmen tynystap, saltanatty shaqty sát sanap kútip turdy. EKSPO degen bir aýyz sóz sońǵy jyldardyń kóleminde buqara halyqtyń sanasyna saqtalyp, jadynda jattalyp qalǵan erekshe uǵymǵa aınalǵan edi. Myń ret atyn estigen mereıli sharanyń zaty qandaı bolady eken degen saýal kópshilik jurttyń kókeıinde turdy. Ashyq aspan astyndaǵy alańqaıǵa jınalǵan jas pen kári LED ekrandaǵy «Qazaqstan» Ulttyq telearnasy arqyly taratylyp jatqan tikeleı tolqynnan kórmeniń saltanatty ashylýynyń eń bir tamasha sátterine kýá boldy. «Osynaý kópten kútken tarıhı sátti úıde otyryp kishkentaı kókjáshikten kórgenshe, jurtpen birge tamashalaǵan áldeqaıda tartymdy ári áserli» deıdi, alańǵa jınalǵan qala jurtshylyǵy. Ashylý rásimi bastalǵanǵa deıin jınalǵandarǵa álem órkenıetindegi aıtýly kórmeniń tarıhyna qatysty tanymdyq suraqtar qoıylyp, jeńimpazdarǵa EKSPO bıletteri tabys etildi. Jınalǵandardyń ishinen elimizge tanymal mádenıet qaıratkerlerin, sport sańlaqtaryn, bir top zııaly qaýym ókilderin de kezdestirdik.
– Búgin elimiz úshin úlken mereke. Osynaý mereıli sáttiń ashylý saltanatyn Astanaǵa baryp qyzyqtaýǵa jol túspegennen keıin osy alańǵa kelip kópshilikpen birge tamashalaýdy uıǵardym. Úıde otyrǵanǵa shydamym jetpeı, nemeremdi ertip osynda keldim. Ashylý saltanatynda, Elbasymyzdyń aıdaı álemniń aldynda, «Uly dalaǵa qosh keldińizder» degen bir aýyz sózin estigende boıymdy ózgeshe qýanysh bılep, tóbem kókke jetkendeı boldy. Dál osy sátte ǵasyrlar qoınaýynda ata-babalarymyz kórgen qıyndyqtyń barlyǵy artta qalǵandaı kórindi. Kózime qýanyshtyń jasy keldi. Uly eldiń urpaǵy ekenimizdi álemge pash ettik. Jasym 80-ge kelse de shilde aıynda Astanaǵa baryp kórmeni óz kózimmen tamashalasam degen nıetim bar deıdi, – Bilim berý isiniń úzdigi, ardager ustaz Seker Aıtbaıqyzy.
Merekelik kóńil-kúımen qala jastary EKSPO-2017 kórmesiniń qurmetine Fleshmob uıymdastyrdy. Úzdik óner kórsetkenderge taǵy da kórme bıletteri úlestirildi.
– Kópten kútken tarıhı sáttiń ashylý saltanatyna da kýá boldyq. EKSPO kórmesi elimizdiń ekonomıkalyq, mádenı-rýhanı áleýetin kóteretin teńdessiz joba. EKSPO-2017 arqyly taýar aınalymy jolǵa qoıylyp, týrıster esebinen Almatynyń da bıýdjet qory molaıyp, qalanyń ınvestısııalyq potensıaly arta túspek. Sheteldik seriktestermen saýda-ekonomıkalyq baılanysymyz da nyǵaıady. Kórme barysynda Almatydan Astanaǵa táýligine shamamen 5830 adam barady. Onyń ishinde, táýligine 13 áýe reısimen 1100 adam qatynaıtyn bolady. Kúnine bir ret 2924 adamdy tasymaldaıtyn 5 temir jol poıyzy, kúnara 1276 adamdy tasymaldaıtyn 1 poıyz, 420 jolaýshyǵa arnalǵan 1 júırik poıyz aptasyna bir ret almatylyqtardy «Astana EKSPO-2017» kórmesimen qaýyshtyrady. Sonymen birge, arnaıy avtobýstar kúnine eki ret 110 jolaýshydan tasymaldaıdy. Sharany tamashalaý úshin shet elderden kelgen týrıster men tranzıttik jolaýshylar sanynyń artýyn eskerip, olarǵa qosymsha birneshe tasymaldaý quraldaryn jumyldyrdyq. Osylaısha, áýe reısteri, temir jol poıyzdary, arnaıy qoǵamdyq kólikter arqyly orta eseppen kúnine 1570 jolaýshyǵa qosymsha qyzmet kórsetilmek, – deıdi EKSPO-2017 kórmesiniń Almaty qalasy boıynsha jedel shtabynyń jetekshisi Samǵat Ermekbaev.
Bizge berilgen málimetter boıynsha, Almaty qalasy men Almaty oblysy jáne qala qonaqtarynan barlyǵy, 500 myńǵa jýyq adam «Astana EKSPO-2017» halyqaralyq mamandandyrylǵan kórmesi kezinde Elordaǵa barady degen boljam bar. Osylaısha, Almaty turǵyndary kórmeniń ashylý saltanatyn birge tamashalap, uıymshyldyq tanytty. Jınalǵandardyń kópshiligi osynda kelgennen keıin erekshe áserge bólenip, kórmeniń kórkin óz kózderimen qyzyqtaýǵa Astanaǵa attanatynyna shúbámiz joq.
Arman OKTIаBR,
«Egemen Qazaqstan»
