Bala bitkendi mýltfılmmen aldandyrýǵa bolady degen ata-analardyń qatelesetinin osy Káýsar qyz dáleldep berdi. Es bilgennen sporttyq jarystardy qyzyǵa tamashalaǵan kishkentaı kórermen, ásirese, Sochıde ótken qysqy Olımpıada kezinde «kókjáshiktiń» aldynan jıi tabylǵan. Sodan keıin el qorjynyna jalǵyz júldeni salǵan Denıs Tendi teledıdardan kórse qýanyshyn jasyrmaǵan. Qyzynyń boıyndaǵy osy bir erekshelikti, mánerlep syrǵanaýǵa degen qyzyǵýshylyǵyn ańǵarǵan anasy Janbota Atabekova qysqy sport mektebine ertip barady. Sóıtip, Káýsar №8 qysqy sport mektebinde tájirıbeli jattyqtyrýshy Marına Shevchýktan muz ústindegi ónerdi úırene bastaıdy. Jattyqtyrýshysymen tez til tabysyp, mánerlep syrǵanaýdyń ári óner, ári sport ekenin erte uǵynǵan ol tabandylyǵynyń arqasynda elimizde ótken birinshilikterde júldeli oryndardan kórindi. Nátıjesinde, halyqaralyq jarysqa qatysýǵa múmkindik aldy. «Qyzymnyń Reseıde ótetin halyqaralyq jarysqa baratynyn estigende qatty qýandym. Máskeýge barǵanymyzda Reseıde sportqa qatty kóńil bólinetinin ańǵardyq. Álemdik standartqa saı sport kesheninde dúnıeniń túkpir-túkpirinen kelgen sportshylarǵa qarap, jarysta Káýsarǵa qıyn bolatyn shyǵar dep topshyladym. Olardyń osaly joq, barlyǵy tek jeńiske jetemiz dep keledi emes pe? Káýsar muz aıdynyna shyqqanda júregim dúrsildep, qatty tolqydym. Degenmen, qyzym aıdynda ózin erkin ustap, sekýndtar ótken saıyn meniń kúdigimdi seıiltip, senimimdi nyǵaıta berdi. Myń burala bı bılep, kórermenderdi tánti etti. Eń joǵary upaı jınady. Osylaısha ol týrnır jeńimpazy atandy. Onyń jattyqtyrýshysy Marına Shevchýkke jáne oqýshylarǵa jaǵdaı jasap otyrǵan mektep dırektory Baqytjan Zııabekovke alǵys aıtqym keledi», deıdi Káýsardyń anasy.
Káýsardyń jeńiske jetýine bıge qumarlyǵy da septigin tıgizgeni anyq. Ol qaladaǵy óner mektebindegi bı úıirmesine qatysady eken. Iаǵnı, oqýmen qatar sportqa da, bı úıirmesine de barýǵa ýaqyt taýyp júr. «Muz aıdynynda óner kórsetken qarsylastaryma qarap, «menen asyp bara jatqan eshteńesi joq eken ǵoı», dep oıladym. Sodan keıin óz-ózime degen senimdilik paıda bolyp, oıymdaǵyny júzege asyra aldym», deıdi Káýsar.
Toǵyz jasynda halyqaralyq týrnırde top jarǵan Káýsar Ybyraıqyzy bolashaqta qysqy Olımpıada júldegeri nemese jeńimpazy bolýdy armandaıdy. Jáne osy maqsatta ýaqytynyń kóbin sport pen ónerge arnaıtynyn da aıtty.
ShYMKENT
