Aýdıogıdpen Astanany aralańyz
Astana qalasyndaǵy «Nurjol» gúlzarynda, barlyq saıabaq aýmaǵyn qamtıtyn Esil ózeniniń jaǵalaýynda aýdıogıdpen jaıaý júrginshilerge arnalǵan ekskýrsııalar jumys isteı bastady. «Astana Konvenshn Bıýro» JShS dırektorynyń orynbasary Asqar Adambekovtiń aıtýynsha, bıyl eki jaıaý aýdıogıd kópshilikke qyzmet etpek. Onyń kómegimen týrıster men qonaqtar qalanyń negizgi aıshyqty jerleri týraly qajet aqparatty ala alady.
Qyzmetti paıdalaný úshin «Han shatyr» saýda jáne oıyn-saýyq ortalyǵy janynda, «Báıterek» monýmenti aldynda jáne Esil ózeniniń jaǵasynda ornatylǵan arnaıy shatyrshalarǵa barý kerek. Aýdıogıd pen jol kórsetýshi kartany alyp, 5 myń teńge kepildeme qaldyrsańyz bolǵany. Baǵyt aıaqtalǵan soń qurylǵylardy tabystap, kepilge qaldyrǵan týrıst aqshasy keri qaıtarylady.
«Elordanyń aıshyqty jerleri týraly aqparat qazaq, orys, aǵylshyn, qytaı jáne ózge de tilderde bolady. Bıyl jaıaý júrginshiler gıdin «Easy Travel» jelisi arqyly paıdalanýǵa múmkindik jasaldy. Basty aıyrmashylyǵy – mundaı jaǵdaıda aýdıogıd úshin kepildikke qurylǵy alýdyń qajettiligi bolmaıdy. Kez kelgen adam mobıldik qurylǵy arqyly «Easy Travel» portalyna kirip, sol jerde Astananyń kórikti jerleri týraly barlyq qajetti aqparatty tyńdaı alady», deıdi A.Adambekov. Onyń sózinshe, «Easy Travel» jelisinde búkilálemdik jaıaý aýdıogıdter júktelgen. Kórgenimizdeı, ol Astanada da paıda boldy.
Ulttyq ónimderdi nasıhattaýǵa úlken múmkindik
EKSPO-2017 kórmesi qarsańynda otandyq taýarlar satylatyn «Halyq markasy» pavılony boı kótergeni týraly osy ýaqytqa deıin jazǵan bolatynbyz. Onyń birinshi qabatyna «EKSPO-2017» belgisi basylǵan kádesyılar, magnıtter, sporttyq kıimder, oıynshyqtar, keńse zattary syndy kópshilik tutynatyn dúnıeler qoıylǵan. Ekinshi qabattan qazaqstandyq dızaınerler tikken kıimder, zergerlik buıymdar, teri ónimderi, besik, sandyq, tósek jabdyqtary, tipti, otandyq kosmetıkalardy da tabýǵa bolady. Taǵy bir qabat otandyq azyq-túlik zattaryna arnalǵan. Onda qurt-maı, irimshik, et taǵamdarynyń dámin tatyp, sol mezette satyp alýǵa múmkindik bar. Ulttyq brendterdiń basyn qosqan pavılonnyń artyqshylyǵy sol, otandyq taýar óndirýshilerden tikeleı jetkiziledi jáne taýarǵa ústeme baǵa qosylmaıdy.
«Kez kelgen otandyq ónim bizdiń sórede úsh aı tegin turady. Úsh aıda halyq oń pikir bildirse, taýar suranysqa kóptep ıe bolsa, kelisimshart bekitip, aqyly túrde yntymaqtastyq ornatamyz», deıdi «Halyq markasy» qazaqstandyq taýarlar men qyzmetter sapasyn baqylaý federasııasynyń prezıdenti Rımma Tájibaeva. Munda qyzmet kórsetý sapasyna erekshe mán berilgen. Qyzmetkerlerine ulttyq kıimmen júrý, kelýshini «Qosh keldińiz!» dep kúlimdep qarsy alý mindettelgen.
«Astanaǵa kelgen sheteldikterdi záýlim ǵımarattarmen, gambýrger, koka-kolamen tań qaldyra almaımyz. Olar bizdiń ulttyq ereksheligimizdi izdep keledi. Pavılon tabaldyryǵynan attaǵan árbir adam qazaqtyń kıimin kıip, taǵamyn tatyp, ásem buıymdaryn kórip, shyn máninde Qazaqstanda júrgenin sezinetin bolady», deıdi Rımma Danabaıqyzy. Onyń aıtýynsha, federasııanyń basty maqsaty – shette suranysqa ıe bolady-aý degen Qazaqstannyń sapaly ónimderin jınap, eksportqa shyǵarý. Sol sebepti, Aqtaý áýejaıyndaǵy «Duty free» jelisimen kelisimshart jasasqan. Al Aqtaý qalasynyń tańdalǵan sebebi – teńiz jaǵasyndaǵy shahar arqyly taýarlardy Ázerbaıjan, Arab elderi, Túrkııa sııaqty 25 memleketke eksporttaýǵa bolady.
R.Tájibaeva EKSPO-2017 kórmesiniń otandyq ónimderdi nasıhattaýǵa úlken múmkindik ekenin atap ótti. «Halyqaralyq sharaǵa kóp qonaq keledi. Bul – ulttyq ereksheligimizdi kórsetýge, ózimizdi tanytýǵa, otandyq ónimderdi nasıhattaýǵa tamasha múmkindik», dedi ol. Kórme aıaqtalǵan soń, «Halyq markasy» federasııasy Qazaqstannyń úzdik 100 brendin marapattap, «Miss Kazakhstan – Made in Kazakhstan» sulýlyq baıqaýyn ótkizbek.
Ashat RAIQUL,
«Egemen Qazaqstan»
Sýretterdi túsirgen
Erlan OMAROV,
«Egemen Qazaqstan»
