Toqsanynshy jyldardyń bas kezindegi Qazaq eliniń óte múshkil jaǵdaıynyń kýágeri bolǵandyqtan Otanymnyń búgingi jetken bıigi, til-kózden aman bolsyn, «táýbe» deımin. Táýelsizdiktiń alǵashqy jyldarynda azyq-túlik dúkenderiniń ishi typ-tıpyl bolyp, bos qalǵanyn kórdik. Nan túsetin ýaqytty kútkendi de bastan ótkizdik. Tipti tuz taba almaı, kórshilerden qaryzǵa surap alǵan kúnder de boldy dep, qazir aıtsaq, jastarymyz ertegi aıtyp otyrǵandaı tańǵalady. Meniń qatarlastarym biledi, bul – shyndyq.
Tuńǵysh Prezıdentimiz basshy boldy, el-halyq qosshy boldy. Búgingideı Otanymyz jaınaǵan, jarqyraǵan zamanǵa jettik. 1991 jyldan 2011 jylǵa jetkende tutas bir ǵasyrdy artqa tastaǵandaı boldyq. Kúni keshe ǵana, nebári 20 jyl buryn qırandynyń ústinde qalyp, ne bolary belgisiz kúı keshken Qazaq eli 2012 jyly Elbasy jarııalaǵan «Qazaqstan-2050» Strategııasyn basshylyqqa alyp, álemde damyǵan eldiń qataryna jetýge baǵyt aldy. Jyl basynda Tuńǵysh Prezıdentimiz álemdegi damyǵan 30 eldiń qataryna qosylý úshin Otanymyzdy úshinshi, ıaǵnı saıası reforma men ekonomıkalyq jańǵyrýdyń jańa kezeńine bastady. Belgili saıasatker Margaret Tetcher «ekonomıka degen – qural, maqsat – jandy ózgertý» dep jazǵanyndaı, jańa kezeńniń mindetterine jetý úshin dúıim jurttyń nazaryn aýdarǵan maqalasynda Elbasy qazaqstandyq qoǵam men memleket quraýshy halyqtyń rýhanı jańǵyrýǵa tikeleı táýeldi ekenin taldap aıtyp, bolashaqqa baǵdar bolatyn birneshe baǵytty kórsetip berdi. Qazaq halqynyń ulttyq rýhanı ózegine aınalǵan qundylyqtardyń ozyǵyn saqtaı otyryp, damytyp, búgingi zaman talabymen úılespeıtin orynsyz ysyrapshyldyq pen astamshylyqqa, dańǵoılyq pen kerdeńdikke urynbaýǵa shaqyrdy.
Elbasy dúnıejúzilik damýdyń keshegi, búgingi betalysynyń ózegine aınalǵan jańǵyrý úlgilerin sol qalpynda qazaqqa tańý ulttyq tabıǵattan adasýǵa aparatynyn da eskertedi. Qazaq halqynyń kesheden búginge jetken tarıhy, tereń ulttyq rýhanı ozyq salt-dástúrleri, shynaıy patrıottyq ustanymy elimizdiń bolashaqqa senimmen nyq qadam basýyna myqty tirek bola alady. Osy oraıda Elbasynyń árqaısymyzdyń júrek túkpirimizdegi týǵan jer týraly oı-sezimdi tamyrshydaı tap basyp, az sózben kóp oıdy tarqata aıtqany qandaı keremet! Adamdyqtyń asyl arnasy «Týǵan jer» baǵdarlamasy qazaq balasynyń qan tamyryn bulqyntary anyq. Bul – barshamyzdyń týǵan jerge degen súıispenshilik, rızashylyq sezimderimizdi tumshalamaı, jarqyrata kórsetýge jumyldyratyn izgiliktiń, ıgiliktiń baǵdarlamasy. Otanshyldyq, patrıottyq sezimniń, ulttyq múdde jolynda uıysýdyń qaınar bastaýy ispetti. Týǵan jer qashanda, álemniń qaı pushpaǵynda júrsek te, júrek túkpirinde, kóńil tórinde magnıtteı ózine tartyp turady.
«Týǵan jer» baǵdarlamasyna tıek bolǵan jaqsy bastamalardyń, ıgilikti isterdiń tálimdi nyshandary shashyrańqy bolsa da el ishinde barshylyq. Mysaly, meniń týǵan jerim Tarbaǵataı aýdanynda (Shyǵys Qazaqstan oblysy) kásipker baýyrlarymnyń qarjylaı demeýshiligimen birneshe jyldan beri qazaqsha kúresten Yrǵyzbaı áýlıe Dosqanauly babamyzdyń atyndaǵy respýblıkalyq jarys ótkiziledi. Qazaq sportynyń týyn, jastardyń rýhyn kóteretin bul jarys aýdan ortalyǵynda jalǵasa bermek. Sondaı-aq, Almaty qalasyndaǵy «Mereı» baspasynan «Tarıhqa toly – Tarbaǵataı» ǵylymı-tanymdyq jınaǵy jaryq kórdi. Bul Elbasy aıtyp otyrǵandaı, orta mektepte týǵan jerdiń tarıhyn oqytý úshin tarbaǵataılyq muǵalimderge kómekshi oqýlyq quraly bola alady.
Kásipker baýyrlarymyz bul úrdisti jalǵastyryp, jylyna bir ret «Tarıhqa toly – Tarbaǵataı» almanaǵyn shyǵarýdy josparlap otyr. Aýdan ortalyǵy Aqsýat aýylynda jańa kóshelerge ómirden ozsa da, óshpeıtin izderi qalǵan, táýelsizdik jyldarynda memleketimizdiń damýyna eleýli úles qosqan týǵan ólke túlekteriniń esimderi berile bastady. Aýdandyq ákimdik pen máslıhat birlesip úlgili urpaǵymen mereıi ósip, qýanyshqa kenelip otyrǵan analarǵa «Tarbaǵataıdyń altyn anasy», aýdannyń órkendeýine belsendi atsalysqan zeınetkerlerge «Aýdannyń ekonomıkalyq jáne áleýmettik damýyna qosqan úlesi úshin» tós belgilerin taǵaıyndady. Ulttyq rýhanı tutastyqty nasıhattaıtyn eskertkishter ornatýda da ıgi izdenister kórine bastady. Halqymyzdyń ulttyq biregeıliginiń myzǵymas negizin quraıtyn, alǵash ret aýqymdy jobaǵa aınalǵan «Týǵan jer» baǵdarlamasy aldaǵy ýaqytta elimiz boıynsha asa mańyzdy isterdiń jınaqylyqpen, júıelilikpen júrgizilýine keń jol ashady. Týǵan jerge degen súıispenshiliktiń taraý-taraý arnasy teńizge aınalyp, Elbasy aıtyp otyrǵandaı, jalpyulttyq patrıotızmniń naǵyz ózegi bolary haq.
Rýhanı jańǵyrýdyń tiregi – týǵan jerimiz.
Saırash ÁBIShQYZY,
baspasóz ardageri, Qazaqstannyń eńbek sińirgen qaıratkeri
