«Búgin aıtýly oqıǵa bolyp jatyr. Biz eń iri kún elektr stansasynyń qurylysyn bastap jatyrmyz. Bul bizdiń aımaqtyń EKSPO-ǵa syılyǵy, − dedi ashylý saltanaty barysynda Qaraǵandy oblysynyń ákimi Erlan Qoshanov. – Investorlarǵa, seriktesterimizge jobalaryn júzege asyrýda Qaraǵandy aımaǵyn tańdaǵandary úshin alǵysymdy bildirgim keledi. Jańǵyrmaly energııa kózderin damytý – ol Elbasynyń tapsyrmasy. Búgingi tańda oblysymyzda biz sol tapsyrmany oryndaý úshin alǵashqy qadamdar jasaýdamyz».
Aımaq basshysy úlken daıyndyq jumystary jasalǵanyn atap aıtty. Qazirgi ýaqytta zańdyq jáne qarjylyq máseleler sheshilgen, barlyq ruqsat berý rásimdemeleri oryndaldy. Kún elektr stansasynyń qurylysyna 160 ga kóleminde jer ýchaskesi bólingen. Jobanyń tehnıkalyq negizdemesi qurylyp, saraptama qorytyndysy alyndy. «KEGOC» AQ-pen birge qýat shyǵarý nusqasy quryldy jáne quptaldy, qosýdyń tehnıkalyq sharttary alyndy.
«Bizdiń ınvestorlar úshin buǵan jetýdiń joly kúrdeli jáne uzaq boldy, olar bes jyldan artyq ýaqyt jumsady. Bul istiń logıkalyq sońy osy jerde Ortalyq Azııadaǵy eń úlken kún elektr stansasy iske qosylǵanda bolady», dedi Erlan Qoshanov.
Investorlardyń aıtýynsha, qazirgi ýaqytta qurylystyń bastalýyna barlyǵy daıyn. Joba bastamashylary Qazaqstanda kún energetıkasyn damytý úshin barlyq jaǵdaı bar deıdi. Qajetti aýmaqty tańdaýda jergilikti bıliktiń qoldaýy mańyzdy ról atqarǵan eken.
«Bul jobany sátti júzege asyrýǵa baılanysty barlyq negizgi máseleler sheshilgen. Biz búgin kún elektr stansasynyń qurylysyn bastadyq, ony 2018 jyly aıaqtaýdy josparlap otyrmyz. Bizdiń elektr stansamyz qazaqstandyqtardyń ómir sapasyn joǵarylatýǵa septigin tıgizetinine senimdimiz. Birinshiden, bul «jasyl» tehnologııalar jáne qorshaǵan ortany lastanýdan saqtaıtyn ádis. Ekinshiden, jańa jumys oryndarynyń ashylýy», − dedi jobanyń bas ınvestory Iаn Zonnenshaın.
Belgilengen jer aýmaǵynda 370 myń kún panelderi ornatylady. Bir jyldyq elektr energııasynyń óndiris kólemi 145 mln kVt/s quraıdy. Stansanyń qýattylyǵy − 100 MVt. Salystyrar bolsaq, Saran qalasy 10 ese azyraq qýat jumsaıdy.
Mıras ASAN,
«Egemen Qazaqstan»
Qaraǵandy oblysy
