Konsert shymyldyǵyn Almaty qalasynyń ákimi Baýyrjan Baıbek ashty. Ol Astana qalasynyń róli erekshe ekenin atap ótip, elorda elimizdiń jetistigin, bolashaqqa umtylysyn aıqyndaıtynyn jetkizdi. «Barlyq qazaqstandyq jaqsy kóretin Almaty – el tarıhyna táýelsizdiktiń altyn besigi retinde endi. Prezıdenttiń turaqty qamqorlyǵynyń arqasynda Almaty zamanaýı megapolıske aınalyp, eýropa qalalarymen básekege túse alatyn deńgeıge jetti. Almatynyń Astanadaǵy mádenı kúnderi aıasynda biz sizderge elimizdiń baı mádenı murasyn usynamyz», dedi qala ákimi.
Ol Prezıdenttiń halyqaralyq joǵary mártebesiniń arqasynda EKSPO-2017 kórmesiniń Astanada ótkizilip jatqanyn aıtty. «EKSPO-2017 – bul zamanaýı tehnologııa men ınvestısııa tartý ǵana emes, sonymen qatar sanany ózgertý, ınnovasııalyq oılaýdy qalyptastyrý. EKSPO – Elbasy usynǵan rýhanı jańǵyrýdyń bir jobasy», dedi B.Baıbek. Ol óz sózinde halyqaralyq kórme aıasynda ótkizilip jatqan mádenı kúnder barysynda, ıaǵnı 11-19 maýsym aralyǵynda 400-den astam almatylyq ártis óz ónerlerin tartý etetinin habarlady.
Solaısha mádenı kúnder «Almatydan mahabbatpen» atty konsertpen bastaldy. Konsertte «Dosmuqasan», «Jigitter», «Keshıý» toptary, Roza Rymbaeva, Nurlan Abdýllın, Mádına Sádýaqasova, Marjan Arapbaeva, Aıqyn Tólepbergen, Lýına syndy elimizge tanymal ónerpazdar án shyrqady. Al Almatynyń memlekettik qýyrshaq teatry Q.Qýanyshbaev atyndaǵy qazaq mýzykalyq drama teatrynda kúnine eki ret qazaq jáne orys tilderinde «Qulynshaq pen bóltirik», «Kóńildi aıýlar» atty spektaklderin qoıatyn bolady. Sondaı-aq, «Almatynyń etnoaýyly» kórme-jármeńkesi, «Sazgen sazy» folklorlyq-etnografııalyq ansambliniń jáne «Asqar taýly Almaty» konsertteri kórermenderge tartý etiledi.
Aıgúl SEIILOVA,
«Egemen Qazaqstan»
